日期 : 7 Feb 2009 (六)
行程 : 札幌 à 小樽 à 札幌
續上回, 午飯後, 馬上行去薄野"氷之祭典", 主要睇林林種種各式各樣嘅冰鵰, 我都係第一次咁近距離欣賞, 唔經唔覺都行到3點幾, 時間不早了, 要趕火車到小樽啦.
超趕時間, 唯有先由薄野坐地鉄返札幌, 再轉乘火車到小樽駅, 終於要用張"札幌~小樽Welcome Pass"嚟用, 有位好坐啦, 因為要坐成半粒鐘架, 我哋五個人打散晒嚟坐, 一路坐就一路瞓, 都叫自己唔好瞓架啦, 不過人攰就真係好易瞓, 點不知, 係火車實在大好瞓嘅原故, 嗑咗好幾次, 睇嚟差不多到駅, 馬上叫大家準備落車, 點不知真係出事啦 ... 因為車內没有訊號顯示燈, 唯有向車外望望, 同時聽到廣播下一駅 - Otaru. 一踏出車, 就發現有點怪怪, 無嚟幾年之嘛... 點解周圍嘅景物變得咁犀利嘅..., 行多两行, 就叫咗出嚟 ... 頂 ~ ~ ~ 落錯咗駅添... 原來呢個係"南小樽"嚟架, (聽少咗個音添 !!) 真係大鑊囉 !! 唯今之計, 馬上攞本天書出嚟, 睇下大家嘅咩位置, 應該點行至啱, 好彩天無絕人之路, 不幸中之大幸就係 ... 呢條路仲可以幫我哋慳返唔少時間, 依然可以到訪小樽各景點, 食店, 運河, 再返小樽駅坐火車回札幌駅.
其實, 原路亦有不少遊客特意由"南小樽駅"出, 再行去小樽運河, 我哋梗係跟大隧一齊行啦, 行咗無幾耐, 條路正確 !! 熟悉嘅街道就出現係我哋眼前. Thanks God !! 但見天色已黑, 不妙不妙 ! 要發功啦 ~
急步行咗幾間人気店舖, Letao, 六花亭, 北菓樓等等, 手信會留係機場先買, 所以今次只係齋睇, 睇下有無試食. 去到北菓樓, 比我望到以下啫喱仔, 之前係網講到好鬼人気, 咪買咗一小包嚟試, 點不知, 味道勁以藥水, 超難食. 嘥錢 !! (大家見到都唔好買喎, 不過, 係機場有大量試食, 有款類似咁嘅啫喱試食, 不家就不妨試試, 因為有網友話另一隻牌子(HORI)係好好味架, 有啲就話見仁見智, 但我唔sure機場係邊隻牌子. 唔駛錢咪試下囉, 大家可以賭睹運気嘛.
沿路行, 見到好多開始收舖, 呢檔街頭小食, 轉頭返嚟想買, 可惜唔夠一陣, 已經全部賣晒, 真係無緣囉 !!
新鮮熱辣粟一燒, 味道鮮甜, 食落無渣, 真真好味 !!
仲叫咗幾隻炭燒生蠔添 !!
主角出場啦 ! 小樽帶子燒, 好大隻, 好好味 !! 不過貴咗啲 !
行咗無幾耐, 開始落雪, 我哋又要急步又要避雪 !! 真係越行越大雪, 唯有開咗餐先萛, 睇下食完呢餐之後, 雪勢會否改善 !! 經過三心两意嘅決定後, 終於搵咗間target之一嘅寿司店 - 巽鮨 (堺町店), 大家乜都唔埋, 食咗至講 ...
嚟到小樽, 梗係要食寿司啦, 你睇我呢set . 睇落好吸引喎 !! (松にぎり2100円)
不過, 整體嚟講有啲失望, 寿司唔夠新鮮, 魚生有根, 食落有渣, 真係一般. 以下呢 set 貴多少少添喎 !!
今次專程嚟睇"小樽雪燈之路", 但雪勢越落越大, 好多雪燈會場嘅蠟燭, 都被風雪整熄咗, 成條街都變得無乜嘢睇, 天寒地凍, 又有風, 又大雪, 又要避雪, 地下又滑, 唉 ~ 咁嘅環境, 下一步都唔知點好 ??!! ... 大家唯有一路向前行, 行去運河嗰邊睇下點先萛啦. 我哋行到咁上下, 就要避一避雪, 行埋一邊, 整走背脊啲雪, 有帽仲慘, 頂帽入晒雪, 仲要攞返啲雪出嚟, 只要唔好比件羽絨濕, 到時咪仲凍 !! (最衰又唔記得帶件薄Gore-tex 跟身, 真係激死!!) 亂打亂撞, 居然走咗入去呢間頗人気嘅桑田屋, 馬上入去睇下有乜嘢食先 ...
我哋唔執輸, 每人叫咗個人気商品試下, 店內有好多唔同嘅口味任你揀 !!
雪勢依然強勁, 唯有求奇係條街到, 影返幾張相嚟交差啦, 真係慘囉...
你睇啲雪, 真係好大架 !! 其實再過多條馬路, 我哋就可以睇到"雪燈之路"最中心部份 - 小樽運河. 好靚架 !!
沒有留言:
發佈留言