2009北海道 Day 3.2 - 住宿 "Pension Jacatra" @美瑛

住宿 : Pension Jacatra (ペンション ジャガタラ) 1 泊 2 食 @8400円

係旭川坐火車到美瑛, 車廂內悶熱非常, 好易瞓着, 好彩只係半個鐘就到, 唔駛焗得咁辛苦. 約咗民宿主人5pm係美瑛駅pick up (pick up service : 15:00 - 17:00), 雖然佢唔識英文, 但好醒目, 一出閘就對準我哋5個人外地人, 主動叫我哋上車, 我當然同佢核對大家嘅身份先好上車啦. 佢揸咗架7人車嚟, 比我哋5個大人同5件大行李, 緊緊塞到爆一爆. 好彩啫...

天開始變黑, 雪又開始落, 美瑛夜晚四周一片漆黑, 望向車外乜都睇唔到, 我哋住嘅地方都幾遍遠. 所以夜晚邊到都唔駛去. 無所謂啦, 因為我哋已有好節目了 ...

見到今晚要住嘅地方, 心情好興奮, 因為幾棟建築物外觀真係好靚, (當時仲落緊雪, 越落越大, 所以無影到相). 馬上攞返自己嘅行李返入屋. 而我哋今晚一行5人就係瞓喺一間好有feel, 超級正嘅獨立屋仔裡面, 多麼多麼的高興 ...

屋內有5張單人木床, 此民宿只有2間才有埋獨立浴室及厠所, 至於其他嘅單位, 就要同本館一齊share享用. 所以我早就於上年10月, 用email 預約好了.

以下就係我哋入住嘅 Cottage C (最多可供5人入住)

一邊放置三張木床．電視

另一邊放置兩張木床 (係咪好有鄉村 feel 呢~)

外設兩座洗手盤．按摩椅．風筒

浴室及厠所位置分開，方便眾人同時使用

飯廳設於另一棟本館 (即民宿主人住嗰間屋仔, 係正隔離, 好方便) 於日間可通過巨型大窗, 遠望四周一望無際嘅風景, 視野超廣闊, 仲有望遠鏡比你用嚟觀鳥添喎, 真係諗得周到呀...

呢邊係Pension剛剛添置嘅食堂設備, 好似仲未開始用添喎, 好新淨.

我哋今晚就係呢邊開飯, 睇嚟好吸引, 食落唔駛問 ... 正 !!

北海道有名嘅成吉成汗烤羊肉, 好好味呀 ~

仲有傳統嘅地道日式料理, 你話點會唔飽吖 ...

開餐啦 ~

呢餐真係好．好．好．飽, 正所謂飲飽食醉, 溫泉去 ~

經過短短幾日嘅辛勞, 日日早起身, 行路行到暈, 唔嚟呢個溫泉叉叉電, 之後嗰幾日嘅行程就真唔掂囉, 所以飯後抖咗一陣, 即使又要冒着風雪, 仍要堅持過返本館浸溫泉. 原來今晚只得我哋5個人入住咋, 所以乜嘢設施, 我哋都可以霸住嚟用, 呢個溫泉, 我哋真係好享受, 今鋪真係嘆到暈 ~ 超級推介.

噢, 慘啦 ~ 點解出面啲雪越落越大架 ??!! 我哋仲要過返去我哋間屋仔喎, 唉... 死就死啦, 唔理三七二十一, 我哋係咁衝． 衝．衝．冒着橫風橫雪, 終於衝返自己嘅竇, 安樂晒啦.

心想, 雪一直係咁落, 聽日咪好大鑊 !! ... 因為我哋聽日要出去影相...呢項係我第三次嚟北海道最大原因之一. 所以對我嚟話, 真係好重要架 !! ... 唯有 ... 聽天悠命啦 ~

嘆完溫泉, 又要開餐, 我的推介 - 必食蘋果

是晚分享 :

去美瑛嘅旅行旺季, 當然係夏天去啦, 好多年前, 我都嚟過, 對美瑛簡直一見鍾情, 不過當時入住富良野, 今次特登選擇住美瑛, 真係無揀錯, 除咗以上種種原因外, 請務必留意下期精采.

如果大家正在計劃到美瑛一遊的話, 這間Pension就係我嘅 No. 1 推介 ... 正 !!