日期 : 8 Feb 2009 (日)
行程 : 札幌 à 旭川 (旭山動物園) à 美瑛
今朝要好早起身, 因為有好多嘢要做, 首先係check out, 我哋死都唔蝕底, 仲要係酒店食埋個免費早餐再趕火車 (札幌 7:40 發 旭川 9:16 着) 原先計畫坐札幌 8:00 發/旭川 9:20着, 諗住可以瞓晏啲, 點不知, 好早就full到爆, 最終要改坐7:40火車先有位. 去到旭川, 又要預時間搵 locker 放好我哋 5 件 29" 嘅大行李, 之後又要搵巴士站搭車去旭山動物園, 車程約 40min. 如果趕唔到 9:40 班巴士, 下一班巴士仲麻煩, 要等到 10:10 先再有車開出, 去到動物園都已經 10:50, 距離企鵝巡遊時間 11:00 只剩 10min, 根本就無乜時間比我哋霸個靚位影相. 如果睇唔到呢場, 大家就要係呢個冰天雪地上捱到下午 14:30 另一個巡遊時間, 到時就真係慘慘慘囉. 所以根據以上種種原因, 今日行程一定要早, 趕, 快 .....唔該大家合作啲 !!
早上 6:45 已推行李到 lobby check out, 東橫inn早餐時間7:00開始, 但時間未到, 已經有 2x個人排隊等早餐開. 有得食, 我哋就梗係排埋一份啦, 等到開餐, 嗱嗱淋食飽就萛, 拖埋行李離開東橫inn, 唉... 一出門口, 又開始落雪啦, 真係唔理得咁多啦, 大家要快步啦.
順利上到火車, 要坐成2粒鐘, 所以瞓到就瞓. 因為旭川係個大駅, 一定好多人落車, 可以放心大覺瞓. 到駅後, 馬上要搵大 locker, 出閘後向右手邊一直行, 發現好多大 locker, 擺得落 29" 喼, 超開心, 終於可以放下心頭大石啦 ! 再繼續前進 !! go go go ...
跟住馬上搵巴士站, 好在有地圖係手, 死火啦, 已經過咗9:40, 咁就大件事啦, 錯過呢班巴士就要等到下班10:10, 但當時都唔理得咁多, 都要博命趕去睇睇先算 ! ...... 一眼見到有人上緊巴士, 馬上跑上去問問站長叔叔係咪去旭山動物園方向, 無錯, 係呢架巴士啦, 真係皇天不付有心人, 我哋真係趕得切, 謝天謝地囉...... (原來巴士足足 delay 咗 5 分鐘開車), 全程企足20分鐘, 比官方時間40分鐘, 足足企少咗 20 分鐘 ! 真係幸運降臨 ! 車費400円 (認真抵比 !).
10:10到達動物園 (10:30開園), 真係不出我所料, 門口大排長龍, 又係落緊雪, 真係討厭都飛起, 唔想比雪淋, 又懶得排隊, 索性係門口有蓋地方等開園, 估唔到動物園提早10分鐘放人入去, 我哋死都唔行出去淋雪, 咪等晒啲人入去, 我哋先施施然買票入園囉 (800円).
大家放心, 呢到又有大量locker提供, 對我哋呢廷自悠痕友就最啱用啦 !
入到園內, 又要馬上趕去霸個靚位, 等班企鵝出場 (11:00 ). 但唔知點解啲細路真係唔識凍架 ?! 你睇佢哋成個人仔扒係雪面玩, 仲要玩得好開心, 而我哋成班老嘢連企係到等, 都凍都騰騰震呀...... (唔該快啲出場啦 ... )
等咗都幾耐, 佢哋終於出場啦 ~ 大家都情緒高漲起來, 猛咁影相, 猛咁拍片.
啲企鵝行路真係好鬼得意架, 就連我一向唔 like 動物嘅人, 當時都好 High ~
仲有一隻好百厭嘅企鵝仔, 走向我哋面前, 部相機都未 ready 好, 佢又走開咗啦 ~ shit !
一大群企鵝, 好快就行過我哋面前, 時間真係過得快, 又係時間講 bye bye 囉 ......
前面嘅人潮都散得好快添喎...梗係啦, 又要趕去睇其他人気動物明星嘛!
以下呢個主角, 我都唔駛多講囉 ! 佢就係園內人気No.2 - 北極熊, 我哋係到都留咗好耐, 因為要同佢影張滿意嘅相, 真係有啲難度架 !! (我厭佢太瘦啦 !!)
咪話想影一隻難, 要影晒两隻, 就更加難 ! 你睇 ~ ~
呢隻海豹又係人気, 每蓬係人群面前游過, 現場就會起烘般大叫出嚟, 真係講你都唔信. (我哋又係到捕咗好耐, 呢两張都係好難先影到架咋 !!)
影水母, 零難度 !!
呢班企鵝成日係到瞓覺, 我都係第一次見咋 !! (咩叫做企係到都瞓倒, 咪話緊佢哋囉 !)
呢隻企鵝仲巴閉, 你睇我時, 我又望返你哋啲人類係到做乜鬼嘢, 死未 ??!!
呢隻老虎梗係凍到唔想旭 !! 一個字 : 懶
近距離望到呢隻日本國寶 - 丹頂鶴, 真係難得 !
遲啲就可以係香港海洋公園睇到嘅 - 國寶級小熊貓
旭山動物園對出風景, 相當不錯 !!
全程睇咗好多動物, 影咗好多相, 相當滿足, 係時候醫肚, 講到食, 大家仲邊有興趣繼續睇落去吖, 決定馬上離開, 返回旭川駅搵食去也. 两點幾閃人,
嚟到旭川, 點會唔食當地嘅人気拉麵吖, 我哋揀咗超級人気嘅山頭火食拉麵, 跟住地圖搵咗好耐, 硬係搵唔到, 最終要出口問人. 遇到善心嘅日本人, 終於教曉我哋點去山頭火, 原來嗰間本店, 剛剛才搬咗係駅前, 真係比佢激壞, 同時又餓壞, 要快快開麵啦 ~ 唔該 !!
人気鹽味拉麵, 豬骨湯底 (800円)
人気餃子, 必食之選 !! 好味 ~
好味到差啲連湯都清埋 !!
食飽飽後, 趁仲有時間, 去咗百貨地庫超市買生果 + 零食, 留返今晚食 !! 返回旭川駅攞行李, 準備搭車去我至愛嘅美瑛啦 ! 旭川 bye bye 啦 !!
是日分享 :
1. 估唔到對於一個超級唔鍾意動物嘅人, 都想推介呢個地方比其他朋友, 企鵝真係好得意, 仲有其他人気動物 (北極熊, 海豹...), 全部都值得去睇 (可能香港無乜機會見到)
2. 之前計劃行程時, 都幾擔心要花好多時間搵 locker 放我哋五件 29" 大行李, 但最終一take OK ! 仲要咁方便添喎. 正 !!
3. 超 good luck 趕到巴士, 雖然要企 20 分鐘才到動物園, 但已比原定要企 40 分鐘, 少了一半. 賺咗 !!
4. 山頭火嘅拉麵 + 餃子, 真係好好味, 足足可以抵償之前行咗嘅冤枉路. 必食 !!
5. 旭川駅對出嘅百貨地庫 (西武, 丸井今井), 有試食, 我哋係嗰到食咗好多"麵後果" - 蘋果 + 柑. 最後當然有幫襯啦.
沒有留言:
發佈留言