日期 : 9 Feb 2009
(一)
行程 : 美瑛 à 旭川
(轉火車) à 網走
一覺瞓到大天光, 真係乜嘢都唔記得晒囉, 晨早六點幾醒咗, 咪望望窗外天気點啦 ? 唉... 都仲有少少飄雪, 唯有繼續瞓啦 zzz
...
安排咗8點食早餐, 大家好齊心, 一早梳洗好, 收拾晒行李, 觀望出面天気情況, 其實大家都幾擔心 ...
揀呢間民宿另一主要原因就係要參加呢個項目 - Photo Tour, 民宿主人會揸車載我哋去美瑛周圍嘅靚景影相, 去嘅地方一定好人気之餘, 而對於我哋呢類遊客, 就真係超方便啦. (費用 : @3150円/人,
時間 : 9am - 3pm, 午膳1小時, 如早去晒各景點, 會提早完成此course.)
民宿亦提供另有一個Tour 費用 : 2100 円, 只係車去睇風景, 唔可以落車影相, 所以平啲.
Good ! 出面好似停咗雪, 但天色依然昏暗, 無太陽 ! 都係食咗早餐先萛啦 ...
今朝早餐都幾豐富, 睇落份量不多, 但一向大食的我, 都食唔晒 (真的)...
呢個比高飽, 我好鍾意食, 真係好好味. (而其他團友就好鍾意食香蕉下面類似煎糯米團嘅嘢, 外面煎得脆脆地, 好甘香 !)
食飽飽後, 大家見天色依然麻麻, 就問問民宿主人我哋嘅Photo Tour是否照原定進行 ? 佢話無問題, ok喎.
咁大家就返回自已屋仔休息一陣, 等到9am出發, 到時攞埋行李上車去. 因為tour完畢後, 直接到美瑛駅坐火車離開囉.
8:40am, 見民宿主人開始抺走車上嘅厚雪, 心情開始興奮起來 ... Yes ! 返入屋仔一陣, 太陽終於出來了, 興奮程度開始急升 ... Yes, Yes ~
9am, 我哋出發啦. 以下就是本館 (飯廳, 溫泉, 公共浴室全在這裡)
馬上係屋仔附近影下相, 以下呢個靚景, 原來就係我哋屋後, 真係正到暈 ~
影到9:30am, 終於要開車啦, 全人類及行李都一齊上車啦 ~
開咗一陣車, 好快到咗第一個景點 - Christmas Tree
至於之後其他景點, 都唔記得叫乜名囉. 你地自己睇啦 ~
呢個應該係"美馬牛小學", 黃昏時份特別迷人 ~
由於影到忘晒形, 連對鞋舖晒厚雪都唔知 ~ 好彩係Gore-Tex, 無濕到.
跟住都係繼續影 ... 影呀影 ~ 簡直發咗癲一樣 ~
Steven Star 之木 |
不知不覺影咗幾粒鐘啦, 民宿主人問我哋去邊到開飯, 其實當時大家唔食都無問題, 但我哋唔食, 人家都要食架嘛, 所以最後我哋為咗慳時間起見, 要求車我哋去便利店, 買我哋最鍾意嘅飯團 +飲料, 作個簡簡單單的小午餐就萛.
呢架戰車就陪咗我哋大半日啦.
影到差不多2pm, 原來行程都8899, 最後車我哋到美瑛駅, 心情開始有點失落.
原本計畫係美瑛食餐地道嘅人気男爵(馬鈴薯)料理, 但我哋要係旭川駅辦點事,
所以都係返去旭川先再安排一餐正正經經嘅午餐, 因為今晚起碼要到9pm後先至有另一餐呀.
坐火車前 (美瑛14:23發), 我哋又走咗去買飯團, 以備不時之需 !
出咗車票, 我哋走去搵食,
行咗去Esta 5/F, 睇下有乜吸引先 ... 最終揀咗呢間 ギンザ鳴門 -
主攻手打烏冬.手打蕎麥麵, 估唔到 ... 呢間嘢比到我哋驚喜 - 烏冬.蕎麥麵出奇地煙韌, 好味. 讚 !(合共4200円)
飽飽後, 剛好可以緊接著下班火車到網走 (旭川16:42發)
車廂內, 不太爆, 好多空位. 不過要坐成4粒鐘, 都幾辛苦 ~
都唔知瞓咗幾多覺, 終於到達網走駅 (20:37着). 酒店好近火車駅. 沿着左手邊一直行, 即見. 揀呢間酒店嘅主要原因只有三個,
近火車駅; 有三人房; 租金平. 所以鎖定目標. 後期才知道經此酒店預約網走破冰船, 享有9折優惠. 又可以慳啲 !
相片於日間補影 |
我哋瞓嘅三人房
差不多9pm, 放好行李後, 馬上外出搵食, 在没有選擇下, 揀咗 すき家 食牛肉飯.
相片於日間補影 |
叫咗客最細嘅牛肉飯, 味道都幾好 ! (5人合共1590円)
飯後, 要返酒店沖涼瞓覺啦, 因為聽朝又要好早起身呀 !
下期預告 :
你估我哋坐唔坐得成破冰船呢 ?
是日分享 :
1. 真係天公造美, 嚟到北海道, 差不多日日都飄雪濛濛, 終於嚟到美瑛, 第一日有太陽,
仲要係我哋最需要陽光嘅時候出現, 嚟美瑛影相, 係我嘅心願, 今日終於完美完成. 真係超級開心 !
2. 朝早係嘆早餐嘅時候, 通過周邊嘅廣闊大窗, 望出去嘅風景真係好正, 一望無際, 仲有望遠鏡提供, 可以觀鳥, 突然好想 :
夏天不如嚟多次, 再住返呢間pension, 試下個露天風呂 (只於May-Oct開放) 風景應該會仲正 !
3. 我只係用部Sony傻瓜相機仔, 相片效果都無令我太失望, 所以如果大家熱愛影相的話,
呢個地方就好值得推介一下啦.
4. 好耐無坐過咁長時間嘅火車, 上次都已是N年前係由札幌去函館, 只係3粒鐘, 都叫晒辛苦, 今次要成4粒鐘,
好彩車廂唔係網上啲人講得咁鬼熱咋 ! 否則 ... 唉... 不過呢次應該係我史上坐得最長嘅火車囉.
5. 經多次email通知網走嘅酒店幫我哋預約2月10日嘅破冰船, 但一路無收到任何回覆, 即使加埋fax,
都無音訊, 唯有自己先經網上預約, 兩手準備,
以防萬一. 但並無discount. 所以當晚一踏入此酒店, check in後, 便馬上同酒店方面跟進此事, 但憑佢哋嘅身體語言及表現, 睇嚟都無同我哋搞囉.
(佢哋可能無check到email都唔定) 因為當時好夜, 破冰船預約那邊都已收晒工, 最後酒店於第二朝一早, 就幫我哋預約好啦, 只要出示酒店比我哋嘅確認書,
就有9折啦. 慳返300円, 當然此優惠仲有好多酒店參予啦, 但網址已被鏟走.
沒有留言:
發佈留言