日期 : 10 Feb 2009
(二)
全日行程 : 網走 (破冰船) à 北浜駅 {流冰号}
à 知床斜里
{JR觀光巴士} à 標茶 {冬之濕原号}
à 釧路
今篇行程 : 釧路 à 幣舞橋 à 和商市場 à
Hotel946
終於到達釧路, 見到地下無乜雪, 就知道天気開始無咁凍啦, 而且仲陽光普照添, 正呀 !
跟住去咗酒店 check in, HOTEL946 - 揀呢間酒店, 都係離不開三大主要原因
- 近火車站; 有三人房; 價錢平. 放抵行李, 馬上又要趕去另一個景點, 因為日本冬季日短夜長, 下午3點開始日落,
我哋要趁日落前去到幣舞橋影相呀....
雙人房 (6300円) 房間絕對唔萛寬敞, 兩個人只是剛剛夠用.
三人房 (9450円) 就連三件行李都唔夠位放, 不過試問呢個價錢, 仲點會有其他要求吖.
大家將就啲都OK嘅 !
由酒店步行到幣舞橋, 都要成十數分鐘,
大家唯有急步. 但最終都趕唔切睇日落囉. 只睇到水尾, 頗為失望 ... (以下相片加了效果)
如果趕得切嘅話, 我相信當日嘅日落, 必定相當壯觀, 因為天気好 + 位置好 = 正 !
右手邊便是 Fisherman's Wharf
MOO
影完相, 帶着失望的步伐住 "和商市場" 開餐. 時間差不多接近4點有多, 呢餐就係我哋嘅午 + 晚餐, 無錯
! 因為今日較早前, 我哋只係喺火車上食咗飯團, 雪糕等小食頂到宜家.
睇到又有嘢買, 個個都生猛返晒.
我哋好快行咗一轉, (真係好快). 睇睇聞名不如見面嘅勝手丼係點嘅 ?!
其實我哋由此至終都無諗住係到食魚生飯, 所以影咗相交差便萛.
馬上去咗目標食店 - "竹寿司", 揀下食邊set好. 原來老板都差不多收舖,
梗係要做埋我哋生意先啦. 正當老板為我哋大餐準備嘅呢刻, 我哋又要發揮香港人嘅shopping 精神, 出去四圍貢下, 直至開飯啦,
先捨得行返去開餐.
個個團友都叫咗呢set定食 (@2100円), 真係好鬼好味呀 ... 比起小樽嗰餐,
真係好味到多多聲啦.
為咗增取時間, 我哋已經係"等食"嘅時候, 同時間係呢間 "水野商店"
買咗今晚真正嘅大餐 - 北海道長腳蟹啦. 正! 正 !正 ! 我哋驚死間舖快要收檔, 仲同老板講抵, 我哋食完寿司就馬上過嚟開餐, 因為人家收6pm.
只要我哋比咗錢, 必定等埋我哋食完先收工啦.
食完寿司, 緊接住另一餐啦. (請勿見怪 !! 我哋個肚真係仲有位放架 !) 呢餐蟹宴,
我哋真係食到個肚好飽, 好爆. 但超級滿足.
@2800円, 先嚟蟹腳, 果真啖啖蟹肉, 從未如此享受過 ~
@5700円, 再嚟成隻上, 真係一分錢就一分貨, 呢隻還要好味得多. 真係又鮮又美味呀.
救命呀......
你睇 ..... 真係啖啖蟹肉,好味都暈 ~ 這是全程最痛快的一餐 ! 當地人睇到我哋嘅食相都覺得好好笑. 加上我哋又猛咁係影相
(好似大鄉里出城咁) 真係明正言順嘅香港代表呀. 不過當時真係好開心 !
食完兩餐, 比我哋發現仲有間超市未閂門, 入去一睇, 正 ! 收 19:00, 我哋又發揮香港精神啦.
睇下今晚食乜嘢生果好, 又要入貨啦. 啲円好似洗唔完咁 ...
"アベニュー・946" 地下超市 (10:00 ~ 19:00), 位置係"和商市場" 出正門, 再向左手邊 (見LAWSON), 過馬路即到.
當晚買咗少少咋. 足夠兩晚食用, 當然仲有其他零食及手信啦, 蘋果 - 好味; 士多啤梨 - 好好味, 日本大柑 - 超酸, 唔好味, 不要買 !
食到夠皮啦, 要返酒店梳洗, 明天又要早起, 不過對於我嚟講就相當輕鬆.
是日分享 :
1. Hotel 946 : 酒店雖不寬敞, 總萛設備齊全 而且勝在位置方便, 價錢抵住,
適合要求不高及銀兩不足的自悠人仕入住.
2. 行程建議 : 如果大家唔鍾意坐乜乜号及物物号嘅火車的話, 本人強力推介最好中午時份到達釧路, 於和商市場午餐後, 仲可行一轉先, 其實和商市場對於我哋嚟講, 係可以行好耐都得架, 因為有嘢睇, 有嘢食, 有嘢買 ! 好開心 ! 然後再行去幣舞橋欣賞日落, 睇完日落,
仲可以行去隔離嘅MOO睇睇, 睇完都應該天黑了. (冬季日落時間約 15:00開始).
3. 本人認為和商市場食蟹真係好抵, 比起札幌嘅二条市場, 價錢差好遠, 啲蟹真係啖啖肉, 超級鮮味, 唔食就走寶啦 ! 讚
!
但若要買乾貨手信如 : 即食元貝等零食返港的話, 千奇唔好係和商市場入貨, 價錢比起二条市場貴咗好多, 如果你最終站會返回札幌的話,
最好係二条市場先好入手. 又唔駛拎住咁耐, 有你着數. 謹記 ! 謹記 ! (稍後會有詳細介紹)
4. アベニュー・946 地下超市 : 呢間超市都幾大, 好好行, 其實釧路市內街道無乜嘢好行, 店舖好快就收,
所以最好19:00前到超市, shopping一下, 又可以買我哋最鍾意生果及零食, 認真正 !
5. 如果你去過釧路, 你就會發現好多嘢叫做 "946乜乜" 或 "乜乜946", 例如我哋住嘅酒店
: "Hotel946", 仲有 "946餐廳", "946藥房", "946麵包店"等等 ... 開頭都覺得好奇怪. 但之後才發現 "釧路" 嘅日文
"くしろ" 發音同 "946" 嘅日文發音好接近. 所以當地人改名都喜歡用946命名.
沒有留言:
發佈留言