2011北海道Day6.1 - さくらんぼ山觀光農園@仁木

2011年8月9日

JR [ 小樽 9:44 ...... 仁木 10:12 ] 440円

經過連日來不斷咁夜睡早起, 可能習慣關係, 今日大家比原定時門又早咗起身, 又可能知道一早要 check out, 所以係房間食過早餐, 執拾所有物品後隨即放低行李係大堂, 跟手就走去 [ 小樽駅 ], 準備坐火車到 [ 仁木駅 ], 走近火車駅前先醒起唔記請酒店幫忙致電果園安排送迎服務, 好在時間充裕, 馬上調頭 ~

時間仲早, 係火車駅磨咗好耐才斯斯然走上月台, 半小時車程即達 [ 仁木駅 ] ~
 

 

果園的送迎專車已在駅前等緊我哋, 跟司機打個招呼後立即上車, 果園距離火車駅都幾遠, 步行都要四十分鐘, 而坐車就只需幾分鐘 ~

 

 

這是我初次果園體驗, 最初打算前往 [ 余市 ] 那個較有名氣的 [ 山本觀光果樹園 ] 摘水蜜桃, 但該果園回覆八月初果實尚未成熟, 唯有轉戰車厘子, 要摘車厘子的話, 當然要去果園較多選擇的 [ 仁木 ] ~

上咗 [ 仁木町果樹観光協会 ] 續個續個果園篩選, 再綜合網民的詳細服告, 最終決定選定 [ さくらんぼ山観光農園 ], 主要原因係該果園有專車到駅前接送, 其二係果園範圍較大, 就這兩大優點已足以令我唔再考慮其他果園 ~

該果園面積範圍好大, 除了種植地方外, 果園主樓也分有工場, 餐廳及販賣區, 可能仲有地方係我哋見唔到咁大 ~

 

這就是園內餐廳, 雖然我哋無幫襯, 但見地方都唔細仲幾乾淨 ~

 

 

這是售賣園內當造水果, 即摘即賣的車厘子, 梅(李), 唔同種類的蕃茄等等, 粒粒都好香, 好靚, 好新鮮 ~

 

 

這種梅真係香氣撲鼻, 團友也禁不住買了一盆, 連我平時唔多食梅嘅人, 當晚都食唔停口 ~

 

 

開放式工場的其中一角, 行近已聞到陣陣果香 ~

 

 

見學十五分鐘, 終於捨得入場, 每人入場費 1050円, 記住列網站 [ 割引劵 ], 可享有10%優惠, 阿姐比咗五張入場劵在園內任摘任食及五張 100g 的車厘子換領劵於臨走前每人可以免費拎走 100g 約十多粒離開 (下圖) ~

 

 

是日採摘品種有 [ 佐藤錦 ] 及 [ 南陽 ] 兩款, 雖然八月頭已經到了車厘子當造季尾, 但見園內仲有好多樹上熟, 當堂放心晒, 園內阿姐仲叫我哋摘樹頂部份那些車厘子, 會較甜及較大喎 ~

 

 

入到果園內, 見到四周都被車厘子樹圍住, 大家開始情緒高漲, 再加上我都從未試過摘生果, 更覺新鮮 ~

 

 

見到樹上咁多車厘子, 大家已經控制唔到自己, 有人爬上樹上狂摘, 有人不斷影相, 有人一邊摘已經一邊食, 有人想摘又想影相, 情況確實相當混亂 ~

 

 

為免大家錯失這次果園體驗, 決定都係影夠相先再一齊摘, 首先揀了好幾棵車厘子較多的樹底, 大家便在同一個位置快快輪流影相, 影了好幾個角度後, 就開始瘋狂咁摘 ~

 

 

本來大家各自拿了一個膠桶放低自己所摘的車厘子, 由於地面不平, 覺得條梯唔係太過穩陣, 最終都係兩人一組, 一個負責扶梯拎住膠桶接車厘子, 而另一個就爬上梯狂摘, 大家互想交換位置, 摘得好興奮 ~

每當見到樹上又大又紅的車厘子, 大家都會大叫一番, 你又叫, 我又叫, 佢又叫, 成個果園都係我哋幾個人的嘈吵聲, 諗返起都相當好笑 ~

大家一直摘, 係咁摘, 好似摘到唔想停, 見到膠桶都有返咁上下重量, 決定暫停一陣, 搵處舒適地方, 大家慢慢享用, 食完先再來摘過 ~ 

 

 

走到附近的水龍頭, 經過簡單沖洗, 馬上開餐 ~

 

 

見到粒粒新鮮到爆, 大家無停過咁一粒接住一粒咁放入口, 雖然唔係大家食開那款美國車厘子口味, 但依然香甜, 依然好好味 ~

 

 

食到差不多尾聲, 突然見到載我哋上來那位司機走到面前, 用日文講了一大堆說話, 其實大家都唔係好知佢講乜, 但見到佢手持一張火車時間表, 我哋都開始有點眉目, 見到司機做晒手勢通知若要乘搭下班火車, 便要馬上離開, 唔想咁急趕住走的話, 當然可以繼續留係果園任摘任食 ~

經過我哋將打後兩班火車時間作比較, 一係要馬上離開, 一係要玩多三小時先至離開, 但團友覺得要再逗留多三小時確實太長, 情願就此了事, 留返多時間係當日餘下行程 ~

司機仲幫我哋將未食完的車厘子趕快打包, 本來可以拎走 500g, 但只係食剩 2xxg, 又無時間再比我哋入果園摘返夠磅, 唯有用咗三張換領劵拎走, 離開時見有香港遊人自駕前來, 所以順便將其餘那兩張換領送比佢地, 免得浪費 ~

又一次趕火車, 雖然今次唔駛自己身體力行, 但心急程度都唔遜色過之前幾天咁趕火車或趕巴士. 司機迅即駛向火車駅, 我哋都幾好擔心如果趕唔切, 司機又會唔會載返我哋上果園免費再摘過呢 ?

坐緊車都不時望住手錶, 時間都一分一秒過去, 真係心急死人, 還好鄉下地方, 燈位唔多, 路人唔多, 終於係火車到達前兩分鐘趕到駅前, 大家終鬆口氣, 跟司機姐姐道謝後, 隨即踏上月台, 返回小樽, 又來一頓豐富美味的午餐 ~

JR [ 仁木 11:45 ...... 小樽 12:19 ] 440円

 

 

後話 :

其實當時由於場面太過混亂, 所以回程火車時間都睇錯咗, 如果我哋繼續留低, 應該中午一點 [ 13:02 - 13:30 ] 已有火車返回小樽, 不致於要呆等三小時 [ 14:53 - 15:29 ] 這麼久的 ~

慳錢提示 :

若由札幌出發, JR 有提供 [ フルーツ狩りきっぷ仁木 ] 費用包括 JR [ 札幌駅 ] 至 [ 仁木駅 ] 一日來回車票及指定果園入場費用, 相當經濟 ~

有效期間 : 2011年7月1日 - 2011年10月16日