2011北海道Day6.3 - 我在札幌的日與夜 (一)

2011年8月9日

JR [ 小樽 14:34 ..... 札幌 15:06 ] 620円

到達札幌已經下午三點幾, 酒店位於 [ すすきの ] 薄野駅, 所以要再轉一程地鉄先至到, 今次一連兩晚入住 ANA Package 提供的酒店 [ HOTEL RASSO SUSUKINO ], 該酒店位置好近地鉄駅出口, 十分方便 ~

剛好到達酒店可以直接攞房 check in, 上樓放抵行李, 梳洗及休息, 又再出動 ~

時間差不多接近四點, 大家唔想走得太遠, 所以決定前往距離酒店只有幾個街口的 [ 狸小路 ] 掃貨, 直至晚餐時間為止 ~

 

 

大家沿路行下睇下, 無乜特別要買, 唯獨我一定要去藥房幫朋友入貨, 所以藥房成為今次掃貨的主要地方 ~

日本藥房同一款藥物, 價格可以相差好大, 整條 [ 狸小路 ] 約有三間較大規模的藥房, 若有時間又想做個精明消費者, 不妨先忍忍手, 多行幾間格格價才好入貨, 如果唔係, 就好似我幫朋友入咗啲貴貨, 一盒可以相差伍佰円, 我仲買咗幾盒, 真係唔抵 ~

 

 

這是其中一間藥房, 店內有工作人員在場內派發 5% 折扣劵, 可以幫補一下 ~

 

 

花咗一小時行晒整條 [ 狸小路 ], 第一階段出血時間暫告一段落, 大家又要去醫肚 ~

今晚去嘅餐廳相當人氣, 長期都處於滿客狀態, 所以務必預早去排隊等位入座, 我哋離開 [ 狸小路 ], 跟住向 [ 薄野駅 ] 方向一直行, 行咗廿分鐘已到達下個目的地 ~

今餐去食羊肉, 仲要去札幌最為出名的 [ 成吉思汗 だるま ], 該店一共有三間, 兩間分店及本店, 今次我哋揀咗 [ 成吉思汗 だるま 本店 ], 傍晚六點半左右已見人龍, 立即走上前去排埋一份 ~

 

 

其實該店的兩間分店距離本店都是兩街之隔, 所以見到條人龍無乜動靜, 亦順道走去兩間分店視察環境, 考慮轉個顧客較少的分店開餐, 但無論 [ 成吉思汗 だるま 4.4店 ] 或 [ 成吉思汗 だるま 6.4店 ] 人龍都係不相伯仲, 唯有放棄, 返回 [ 本店 ] 繼續等候 ~ 

 

因為有團友唔食羊肉, 所以相約好各自晚餐後返回 [ 成吉思汗 だるま 本店 ] 門口會合, 剩返三位團友繼續排隊 ~

 

 

等咗半小時, 終於可以入座, 馬上向店員點了三份 [ 成吉思汗 (羊肉) ], 因為該店並無套餐提共, 全部都係單點散叫續樣計錢, 見到白飯錢好貴, 又驚住食唔晒, 所以只係叫咗一個白飯 (大) 210円及一支大啤一齊 share ~

我在港一向對啤酒麻麻, 因為食燒肉, 總覺有支啤酒先似樣, 所以都破例叫支來試下, 雖然一支要成 630円, 又係好貴, 但唔試唔知咁好飲, 該啤酒入口超順候, 比起香港飲過的啤酒, 確實易入口, 絕無苦澀味, 讚 ~

 

 

[ 成吉思汗 ] 一份 735円, 份量唔多, 但味道相當好, 肉質好柔軟, 最重要係食落一啲羶味都無, 我哋越食越唔夠喉, 最終亦追加多一份 [ 成吉思汗] 及一碗細白飯 (155円) ~

這款特製的醬汁, 當地人有個地道的食法, 就係當全部食物食晒之後, 可向店員要求加上滖水變成上湯飲用, 我見隔離位哥哥仔飲得相當享受, 但我哋三個都唔敢去試 ~

 

 

鍋上最頂部份那舊肥膏係用來開鑊, 千萬不要放進口裡, 待店員見肥膏開始溶化出油, 再將油均勻搽至全鍋, 這時便可以開始放上羊肉 ~

 

 

記得N年前第一次來到札幌食 [ 成吉思汗 ], 走到 [ サッポロビール園 ] 札幌啤酒園, 初次見識到北海道蔬菜的鮮甜味道, 簡直一試難忘, 到咗今時今日, 依然記憶猶新, 所以我把鍋上不論那埋洋蔥或是大蔥, 通通都放入口裡, 食個痛快.

 

我哋三個異口同聲都話食完都唔覺好飽, 但睇住價錢牌, 又唔捨棄再叫, 叫做幫襯過就算, 大家從未試過食碗咁貴嘅白飯, 諗起今日中午還食剩大半碗, 實在有點浪費 ~

今餐雖然食得滿足, 但唔痛快, 好似睇住價錢就住食, 唔係唔捨得食, 只係覺得唔值, 情願留返啲錢食其他好嘢 ~

 

 

食到周身臭味, 跟另外兩位團友會合後便返回酒店 ~

踏入房間, 冷氣好似唔夠, 儘量調到最大, 但結果一樣, 房間內行得快啲都驚位出汗, 再加上室內的射燈令到房間氣溫又再上升, 感覺真不好受 ~

當晚眾人沒有蓋被都瞓到出汗, 甚至有團友更被熱到汗流全身, 搞到半夜三更走去沖個凍水涼幫助降溫, 才能入睡, 真係唔敢想像明晚會係點樣 ?

估唔到日頭無咩出汗, 反而夜晚先來出晒大汗, 呢個劫數真係點避都避唔到 ~

續 ~