2011北海道Day7 - 我在札幌的日與夜 (二)

2011年8月10日

 

今早, 終於安排外出食早餐, 但酒店附近無間啱食, 所以直接坐地鉄去到 [ 場外市場 ] 再作打算 ~

地下鉄東豊線 [ 東豊すすきの (薄野) ...... 大通 ...... 二十四軒 ] 240円

到達 [ 二十四軒駅 ] 地鉄出口, 左睇右望都唔見有食店, 唯有繼續向住 [ 場外市場 ] 方向一直走, 由地鉄口出發要步行一段路, 全程話長唔長話短唔短, 途中我哋又迷路, 好在及早發現, 立即向路人問路, 總算見到 [ 場外市場 ] 四個大字 ~

 

 

開始肚餓, 周圍睇下有咩啱食, 終於見到一排食店, 由於時間尚早, 有些還未開店, 在選擇唔多的情況下, 一望就望到 [ 味の二幸 ], 之前係網上搵資料時見有極高食評, 本應係一個不錯的選擇, 奈何昨日已係 [ 三角市場 ] 食過類似海鮮丼, 所以大家興趣不大, 唯有繼續搵過另一間 ~

 

走去隔離見有間拉麵店 [ ひぐま ] 正在營業, 唔想再行, 決定就揀呢間, 北海道食拉麵, 好好醜醜都有個保證, 放心去食吧 ~

 

 

走入店內, 唔知係咪因為時間太早, 所以全店只得老板一人, 點好拉麵, 老板隨即開工 ~

我哋坐在吧枱前面, 睇住老板由開始煮麵, 放湯, 上料, 以至最後將碗熱辣辣拉麵送到面前, 都係一個人一腳踼搞掂晒, 我哋好似去咗見學一樣, 過程相當精彩 ~

 

 

由於早餐關係, 唔敢食得太過豐富, 所以只係叫咗個配料簡單嘅拉麵, 作為一個早餐而言, 已經相當夠皮 ~

 

 

餃子, 連早餐都唔會輕易放過, 叫了一客八隻, 雖然分唔均, 但總想試下 ~

後話 : 經網上查返該店資料先知原來係札幌 [ 拉麵橫丁 ] 其中一間拉麵老店 [ ひぐま 橫丁本店 ], 而我哋今次幫襯呢間係分店 [ ひぐま 中央市場店 ], 怪不得水準有番咁上下啦~

 

食店附近亦有少量 Locker 提供, 若有需要, 大家不妨搵下, 就在食店旁的洗手間位置附近, 不難找 ~

 

 

食到飽飽, 大家開始入貨, 首先走到 [ 場外市場 ] 周圍行下, 馬路兩旁大部份都係海鮮檔及手信店, 而我哋主力都係集中買手信, 店舖雖多, 但間間售賣嘅產品都大同小異, 團友見啱就買, 入齊乾貨手信後, 馬上轉戰到附近的 [ さっぽろ青果館 ] 向水果埋手 ~

 

 

[ さっぽろ青果館 ] 全館都係蔬果檔, 仲要以水果為主, 真係啱晒我哋入貨帶返香港 ~水蜜桃 ~ 我的至愛, 本身已經好鍾意食, 不過平時係香港, 莫講話日本產, 就連韓國出產都唔捨得買嚟食, 因為價錢都幾乸脷, 所以每逢夏天水蜜桃當造時節, 我極期量都係喪食價錢較大眾化北京產嘅水蜜桃, 已經好滿足 ~

不過, 今次一場嚟到, 見價錢平過香港好一大折, 確實忍唔到手, 唔入返啲貨, 真係對唔住啲水蜜桃 ~

由於每盒體積唔細, 又怕有手拎返酒店, 都擔心無手拎返香港, 所以大家都唔敢大量入手, 只好量力而為, 最後跟老板討價還價後, 眾人都要滿意收穫, 老板還替我們在紙盒上打上扎帶, 方便大家手提上飛機 ~

 

 

至於另一款人氣當造水果 [ 夕張蜜瓜 ], 雖然團友一早講咗要買返香港, 但鑒於現場環境條件所限, 還是安排大家返回酒店附近的 [ 狸小路 ] 或 [ 二条市場 ] 再好好入貨 ~

 

 

大家拎住大箱細箱由 [ さっぽろ青果館 ] 慢慢行返地鉄駅口, 你都咪話唔辛苦. 不經不覺已經搞到下午兩點幾, 返回酒店放抵水蜜桃及其他手信, 迅即離開, 再次出動掃貨 ~

天時暑熱, 行到周身㷫烚烚, 搵咗個冷氣地方嘆杯凍飲解解喝, 當堂順返晒再繼續行程 ~

 

 

掃貨路線首先由 [ 大通 ] 行到 [ 札幌駅 ] 一帶, 再由 [ 札幌駅 ] 行返去 [ 大通 ], 再繼續向 [ 薄野 ] 掃貨, 因為時間無多, 呢個掃貨過程好似仲趕過追火車, 所以大家又再次搞到身水身汗, 氣羅氣喘 ~

 

 

[ SNAFFLES ] - Cheese Omelette 由第一次到訪北海道開始就一試難忘, 往後幾次都係踏足北海道必食之選, 超級推介, 今次仲係大通駅附近設有地舖, 掃貨之餘亦不忘搵食, 又係餵勞自己嘅時間 ~

買咗四個原味及一個特別版, 試過晒咁多種口味, 始終都原味最好, 所以大家唔駛心多多, 都係原味無死錯~ 

 

繼續掃貨到 [ TOKYU HANDS ], 去過咁多次, 今次先知道原來呢到都可以退稅, 真係孤陋寡聞, 因為顧客唔多, 所以退稅手續都好快辦妥 ~

 

 

最後再次返回 [ 狸小路 ] 走到生果檔 [ サン・フルーツ ] 團友大手掃咗幾個超香超甜價錢相宜嘅北海道蜜瓜, 都可以講話滿載而歸 ~

 

 

行到晚上七點幾, 終於餓到大家要開飯, 走到酒店附近一間幾多人等位嘅鰻魚店 [ うなぎ専門店 かど屋 ] 排埋一份, 試下有無驚比大家 ~

整個鰻魚飯水準都唔差, 但味道始終不及名古屋食過我人生中最好味的鰻魚丼 ~

 

 

因為明早就要離開, 所以食飽都無再周圍行, 係時間開始收拾心情, 收拾細軟, 明早又要趕住出機場再嚟掃過 ~

續 ~