2011北海道Day8 - 北海道最後衝刺

2011年8月11日

 

 

 

北海道最後一天, 晨早個個好乖彈咗起身, 食過早餐, 七點幾已經去到 [ 二条市場 ] 作最後衝刺 ~

雖然時間尚早, 但店舖已經開得七七八八, [ 二条市場 ] 大部份以售賣海鮮為主, 水果商店唔係太多, 走咗一圈, 終於又比其中一檔擺放出來的水蜜桃吸引住, 我跟另一團友又出事地多買了一大盒帶返香港, 雖然價錢比昨天貴咗少少, 但物有所值 ~

唔想返到香港先來後悔, 最終我都係敵唔過北海道蜜瓜的誘惑, 決定掃返一個才肯離開 ~

返到酒店, 大家將剛買回來的手信重新執拾後, 於大堂辦妥手續, 隨即拖着行李走到附近的機場巴士站等候 ~

北都交通 [ すすきの( 南4西3 ) ...... 新千歲空港] 3600円 + 1000円 = @920円

是次酒店位於薄野, 大家回程行李較多, 唔想坐完地鉄又轉坐 JR 咁煩麻, 所以決定轉搭路線較方便的 [ 北都交通 ] 空港巴士前往 [ 新千歲空港 ] ~

空港巴士分站 [ すすきの ( 南4西3 ) ] 就在 [ 東橫 INN 札幌薄野十字路口 ] 門口對出, 距離我哋酒店好近之餘, 又唔駛上落樓梯, 非常方便 ~

車資可於空港巴士上繳付, 亦可於 [ 東橫 INN 札幌薄野十字路口 ] 大堂櫃枱購買車票, 當日由於時間充足, 所以走到 [ 東橫 INN ] 內購買回數劵 4 張 (3600円) 及一張正價單程車票 1000円合共 5 張, 一來可以慳返 400円, 二來免得在巴士上找續咁麻煩 ~

車費 : 單程每人 1000円 ( 付有回數劵 4 張優惠 3600円 )

 

 

 

空港巴士準時埋站, 車程 70 分鐘到達 [ 新千歲空港 ], 落車後立即走到櫃枱先把行李寄艙, 隨即推着餘下的手提行李又開始掃貨 ~

今次係機場有兩個指定入貨點, 一個係我至愛的 [ SNAFFLES ], 自己買咗三盒原味 [ Cheese Omelette ] 仲有免費冰袋送, 而其他團友亦唔輸蝕, 齊齊入貨. 而另一個係小樽食過返尋味的 [ LeTAO ] 的 [ Double Fromage ], 主要係團友入貨, 因為我手提無位, 唯有放棄 ~

係機場行到咁上下, 食埋個 Lunch 又要準備上機, 拎埋手提行李都係時候要跟北海道說聲後會有期 ~

 

手信篇 : 前後足足買咗三盒山梨縣出產嘅水蜜桃及一個北海道蜜瓜 ~

 

 

三盒水蜜桃當中, 一盒係黃金桃 ~

 

  

最後係 [ 二条市場 ] 買咗個中富良野出產的蜜瓜, 返到香港都要等成個星期先至可以開嚟食 ~

 

 

三盒 [ SNAFFLES ] 的 [ Cheese Omelette ], 返到香港先知買少咗唔夠分, 當時應該一次過買夠五盒, 啱啱一個冰袋可以放晒 ~

 

 

雖然機程頗長, 再加上要係東京轉機, 但攞到返香港無論外形或味道都無乜變質, 讚 !!!

 

 

一個超級滿意, 行程豐富的北海道旅程就此終結, 感謝大家收看我前前後後八天的出汗過程 , 嘻嘻 ~

最後, 特此明謝團友 [ 布甸 ] 出手相助, 幫我手提一盒水蜜桃由薄野酒店返到香港機場. ( 團友就是這樣利用的, 哈哈 ) Anyway, Thank you very much !