2011年8月8日
北海道中央巴士- 積丹線21号 [ 日司 15:37 ( 15:41 ) ...... 小樽駅前 17:29 ( 17:35 ) ] 1520円
返到小樽, 由於時間尚早, 先安排返回酒店路經的 [ LeTAO ] 買一個人氣 No.1 的 [ Double Fromage ], 雖然我已經係第四次到訪小樽, 但一次都未試過呢款 [ 雙層芝士蛋糕 ], 所以今次經朋友強烈推介下, 終於決定買來今晚當飯後甜品 ~
購買時, 店員仲問我哋好多嘢, 因為蛋糕要保持低溫, 仲提我哋要係進食前兩至三小時解凍味道最佳, 由於酒店好近該餅店, 所以我哋唔駛乾冰保溫, 就咁將個雪得冰冰的蛋糕拎返酒店, 直接放係房間一角解凍, 留返今晚食完晚飯, 影完小樽運河夜影才慢慢享用 ~
返到酒店整理梳洗後, 又再出動搵啦 ~
走到舖面, 只見座位不多, 枱椅空間較小, 再上油煙味好重, 所以老板建議我哋坐在外面路旁, 空氣比較清新 ~
看過餐牌, 款式不是太多, 所以大家一致點了份量較多及賣相吸引的 [ 北海天丼 ] 1500円 ~
等候其間, 雖然只見店員及老板都是同一個人, 一腳踢做晒所以門面及廚房的所有工作, 還好我哋可以周圍影下相來消磨時間, 不致於等得太久 ~
過了大約十五分鐘, 我哋期待而久的 [ 北海天丼 ] 馬上送上, 美食當前, 大家只係卦住影相, 好似都無諗過要食落肚 ~
雖然見到飯的份量唔係太多, 還好今晚仲有甜品塾底, 所以唔會擔心今餐食唔飽 ~
淨係食到啖啖海鮮及熱辣辣剛炸好的天婦羅已感滿足, 再加上特製醬汁配上軟硬適中的日本米, 簡直食指大動 ~ 不得不讚 !
食完呢碗人間極品後, 準備離開更發現 [ ニューなると ] 就在隔離, 這間是小樽都頗出名的炸雞店, 雖然依家唔能夠再放落肚, 但已打算今晚影完夜景, 買返酒店另作夜宵 ~
這店設有堂食及外賣, 唔想食太多, 但又想試好多, 啱晒我哋買返酒店慢慢歎 ~
終於係小樽運河等到天黑, 運河夜景的確吸引唔少遊客, 還好當日唔係公眾假期, 人潮不致於太過擠擁, 阻住大家影相 ~
玩了好幾十張夜攝, 用腳架及沒用腳架都試過, 逗留咗好耐見玩夠影夠, 終肯離開 ~
 |
| 無用腳架 |
 |
| 有用架腳 |
今日勞碌咗成日, 返到酒店大家開始見攰, 快快脆脆開埋個 [ Double Fromage ] 出來醒醒神, 免得夜長夢多 ~
切開內層一看, 看到上下兩款不同芝士口味, 食落兩者配搭得恰到好處, 相當好味, 眾團友都超讚這款芝士蛋糕, 仲話要係機場買入香港同家人及朋友分享 ~
食過芝士蛋糕後, 其中兩位團友先行回房梳洗, 佢地攰到都無再返過來食埋炸雞, 所以餘下的三個人一於搞掂埋佢 ~
炸雞尚有餘溫, 雖然好似有點熱氣, 但總要食埋落肚至心安理得, 炸雞得炸皮脆肉滑, 聞落好香, 雞肉好嫩, 味道確係唔錯, 不過最後我哋都係食唔晒, 唯有就此放棄 ~
呢餐食完都已晚上十一點幾, 大家見夜又攰, 都無等食物消化已上床入睡, 還好明天不用太過早起, 可以瞓多少少補返下 ~
續~
沒有留言:
發佈留言