日期 : 10 Feb 2009 (二)
行程 : 網走 (破冰船) à 北浜 {流冰号(1号)} à 知床斜里 {JR觀光巴士} à 標茶 {冬之濕原号} à 釧路
坐完破冰船, 跟住就係一連串嘅火車漫遊, 不過首先要到一個好有特色嘅火車駅觀光一番, 火車由網走駅10:01開出, 於10:15到達呢個全日本最北而又最近海嘅 "北浜駅" ...... 一個無駅長當值嘅火車駅......
車駅內四周貼滿名片, 連天花都係, 亦是眾多旅行社前往景點之一 !
睇真啲, 好多人都無準備膠紙或大頭釘, 個個都用藥水膠布貼上去.
車駅外出風景不錯, 唔怪得係景點之一啦 ~
火車嚟啦, 全人類準備 ... 影相 ? 上車 ? 呢架就係好出名嘅流冰号 (冬季限定) 呀 ~
此 "流冰号" 首駅由網走開出, 因為我哋要嚟北浜駅見學, 所以在此上車, 漫長嘅觀光火車之旅就此 ... 正式展開 ~
我哋坐住 "流冰号" 要從 "北浜" 到 "知床斜里" , 再轉巴士到 "標茶" 乘 "冬之濕原号".
"流冰号" 車廂, 唔萛太多人 ! 向海位置就比較 full. 不過, 如果坐唔到, 都唔覺可惜, 因為企係到都可以望到海 ! 視野真係廣闊好多, 大家不用擔心 !
呢邊坐位仲好吉, 你睇......
車廂內有個大碳爐, 可供乘客烤食物 !
11:22 到咗流冰号嘅最終駅 - "知床斜里", 馬上要轉坐 "JR觀光巴士" (11:30開車) 去 "標茶", 就在駅前左手邊, 好易搵到...... 不過我哋足足遲啲15分鐘才開車, 因為要等齊所有乘客, 司機先可以開車, 好似當時仲欠1個人, 唔知條友滕咗去邊呢 ? 最驚趕唔切之後要搭嘅火車 "冬之濕原号", 咁就大件事啦.
等咗好耐, 終於決定唔再等, 枉我哋白白咁等咗15分鐘添. 真激気 !
最終都比原定時間 (13:30) 延遲 15分鐘 (13:45) 才到達"標茶", 馬上要趕快攞回行李再"標"入火車閘啦. 因為火車 "冬之濕原号" (冬季限定) 於13:52就要開出, 只得十零分鐘比我哋轉車咋. 真係趕到暈 ...
最後, 當然比我哋趕到, 因為我哋成個旅程都係趕, 趕, 趕嘛, 已習以為常啦 !
火車真係好懷舊, 幾型 !!
車廂內, 並不是網上講到咁爆啫 ......
呢套車長服飾, 可供遊客穿著影相.
仲有相框道具提供, 咁都比佢哋諗到 !
車廂內唯一的小食部.
火車兩旁, 每蓬有動物出現, 車廂內必定嘩聲四起, 全程金睛火眼, 不斷捕足它們的行蹤, 十分有趣 ! 幸運地, 我們遇見了蝦夷鹿及丹頂鶴.
以下呢兩張相, 就在火車行駛時, 快手捕足影到架, 轉眼間就消失了.
 |
| 大家不妨耐心搵搵兩隻飛緊嘅丹頂鶴啦 ! |
至於蝦夷鹿, 緊係影唔到啦, 因為火車開得快, 拎得相機嚟, 乜都過晒啦 ~
~ 續 ~
是日分享 :
1. 冬季限定的"流冰号"及"冬之濕原号", 火車嘅陳列頗有特色, 如行程上可順路安排上的話, 大家不妨坐坐, 但要是刻意犧牲某些景點或某些項目嚟遷就的話, 我就覺得不太值得, 全程不是想像中咁讚 ! 本人有以下少少的心得 :
流冰号 : 最佳坐位當然是面向海的"海側席", 但坐不到的話, 也不緊要, 因為望到海的時間只是短暫, 好快就過了. 我哋坐非 "海側席", 都望到好清楚架.
冬之濕原号 : 最好揀右手邊的坐位, 全程比較多動物出現.
2. JR觀光巴士 : 此巴士是接駁 "流冰号" 及 "冬之濕原号" 最方便的交通工具, 最好預先在各大火車駅購買, 因為就當日巴士情況全車爆棚, 如果唔係之前係旭川駅買咗票, 結果就不堪切想了.
3. Perfect Match : 如對網走的其他景點並無興趣, 好似我哋咁 ... 一心一意只為破冰船到訪的話, 又想一次過坐晒兩輛冬季限定的觀光火車, 不妨可參考以下行程安排 :
a. 7:25am 巴士由網走駅出發, 約 7:35am 到破冰船碼頭
b. 乘晨早臨時加班破冰船 8:00am 發, 9:00am 回程 (官方要求15分鐘前到達碼頭辦理船票事項)
c. 9:16am 巴士由破冰船碼頭開出, 9:24am 返回網走駅.
d. 返酒店攞行李 (最好酒店位於駅前附近), 10:01am 火車由網走駅開出, 10:15am 到北浜駅, 可於駅內逗留33分鐘遊覽一番, 直至流冰号(1号)駛至.
e. 10:48am "流冰号(1号)" 到達北浜駅, 馬上向知床斜里駅進發, 11:22am着. {如不想前往北浜駅的話, 可直接於 10:25am 由網走開始坐"流冰号(1号)", 直往知床斜里}
f. 11:30am 乘 "JR觀光巴士" 由知床斜里駅開出, 13:30pm 到達標茶駅 (費用1000円).
g. 13:52pm 乘 "冬之濕原号" 由標茶駅開出, 15:10pm 釧路駅着.
4. 如大家上車前影唔到 "冬之濕原号" 嘅全身, 不用擔心, 因為火車到達 "塘路駅" 時會停留6分鐘 (14:22着 / 14:28發), 可讓乘客落車影相, 我哋都係趁呢個時候先影到 "冬之濕原号" 嘅車身咋. Good !
沒有留言:
發佈留言