日期 : 7 Feb 2009 (六)
行程 :
札幌 à 小樽 à
札幌
北海道冬天,
日好短晚好長 (約下午3-4點已日落), 要去晒預定嘅行程, 就真係要早啲起身.
今日原本以為唔駛好趕,
點不知, 你哋睇落就知...
一早係東横inn食個免費早餐, 除咗相片外, 仲有其他種類, 味道ok喎,
仲以為免費會唔好食添. 我哋一向唔注重早餐, 因為最緊要係之後嗰幾餐.
馬上朝向札幌駅入面嘅JR總合案內所出張"札幌~小樽
Welcome Pass" (1500円) 方便下就過小樽. 佢哋真係服務好, 效率高. 要讚讚 !! 套票包括1張 JR 車票 + 1張地下鉄車票, 而我哋今日只會用JR車票來回札幌~小樽.
本來原屬JR總合案內所嘅counter(紅椅)已經full晒, 不過佢哋見到我等緊, 於是叫我過去唔屬於佢哋嘅counter(藍椅)辦理手續, 搞到我都有啲意外.
好耐無嚟, 我對上一次好似都仲未有JR Tower, Stellar Place等建築物 !
沿住呢個方向一直行, 就會到達札幌市一個又一個極具人氣的地方 ~
跟住就向第一個景點進發 - 北海道廳舊本廳舍
( 又名北海道舊市政廳 )
無行去入面睇, 只係外圍影相.因為已是第三次到訪 ! 今次啲雪唔夠厚 !!
下一站 : 札幌市時計台, 今次比我發現到札幌真的有進步, 望望下面
.....
就係呢個阿叔啦, 佢係天寒地凍嘅馬路邊, 不段幫唔同地方嘅遊客揸相機, 你睇佢又企高又助低, 上上下下, 身腳都有晒裝備, 我見佢不停幫人影相, 我都"鄧"佢覺得辛苦, 不過有啲咁嘅服務, 日本人真係要讚一讚先得.
一踏入札幌大通雪祭會場, 就發現呢個吸煙區, 真係第一次見咋. 好有趣 !!
沿着大會指引一路行, 就會見到札幌電視塔, 行到呢都已11點, 要急步啦.
原來雪祭不只有雪像睇, 仲有好多其他設施架 - 溜冰場就是其中之一.
免費入場, 不過要租鞋 (200円)
仲有現場演奏表演, 有水準, 望落去班妹妺仔, 好似只得十零歲咋, 厲害 !!
只供細路仔滑嘅冰梯, 冰梯旁有好多工作人員睇住. 安全第一, 可以放心 !
仲有雪兜, 不過周圍都咁多人, 要玩得盡興都好難囉. 唯有攰就坐下先啦.
梗唔少得食肆啦, 有好多檔口, 不過我哋乜都無試, 要留返個肚食啲好嘢.
只係按咗一罐熱辣辣嘅粟米罐頭湯, 試下好唔好味. 札幌出品零捨不同 ~
不段沿路跟住行, 到咗一個個嘅大雪像出場啦 ~ 不多介紹, 慢慢欣賞啦 ~
仲有白之戀人贊助嘅表演賽, 我都係第一次係現場睇, 佢哋真係好勁呀 !
成個會場都行咗7788, 其他區間都係大同小異, 因為人太多, 天氣又凍, 已經唔想多行啦, 咪叫做見識過就萛囉. 所以決定離開, 跟住去咗醫肚. 我哋都行咗一段時間才到 "牛の松阪", 一入到去, 已經有人等緊,
我哋咪等埋一份, 順便可以休息一下, 好攰呀 ~ 因為坐位唔多, 我哋都等咗一陣.
終於輪到我哋啦, 因為大家對漢堡扒麻麻, 鍾意食牛扒多啲,
所以都係叫 "十勝牛サーロインステーキ(150g)定食 (2000円), 但唔知點解啲當地人個個都係食漢堡扒set, 我哋都有少少驚, 死啦 ! 係咪我哋個啲唔好食嘅呢 ? 不過我哋都堅持唔改, 廚師跟住就馬上係我哋面前開工啦, 睇到口水流
!
我地越睇越唔對路, 眼見一批批嘅日本人, 都依然只叫漢堡扒, 心想 :
可能漢堡扒平啲, 所以先至咁多日本人食啫. 而牛扒就貴啲,
佢哋點會成日食架! 咗呢個地步, 我地就梗係咁樣安慰自己啦. 睇完廚師成個過程,
終於有得食囉. 同時亦終於發覺 ... 啲牛扒
... 味道真係麻麻, 可能我哋叫錯咗食幾成熟, 牛扒老咗啲, 所以肉質鞋咗啲, 食落有渣,
無乜牛味, 真係 NO GOOD !
Lunch set 附沙律, 湯, 飯, 咖啡或茶, 食到飽飽先至走, 再繼續餘下行程 ! 如果大家鍾意食漢堡扒嘅話, 不妨嚟呢間試試, 可能又平又好味都唔定 !!
~ 續 ~
是日分享 :
1. 如果錢對於你唔係一個好大嘅問題的話, 雪祭不妨去睇睇, 但没下次, 若基於成本問題, 不去雪祭,
本人也不覺可惜. 我睇完札幌雪祭, 對於其他地方的雪祭會場, 都不願再去.
2. 睇完大通嘅雪祭, 再去薄野睇冰鵰, 睇完頭幾個冰鵰, 都已足夠, 興趣度大減, 只是例行公事.
草草繞咗一圈就萛.
3. 牛の松阪 : 想食鐵板牛扒, 可以不去這間,
想食漢堡牛扒的話, 將貨就價, 不妨一試. 因為札幌實在太多其他選擇啦.
沒有留言:
發佈留言