Mercado de San Miguel : http://www.mercadodesanmiguel.es/
因見價錢唔貴, 大家又好想一嚐即開即食嘅生蠔, 諗住又再次開餐, 但一見人龍好長, 唯有放棄走人...
畢竟經過一連四天的緊湊行程, 大家無論在體力及精神上, 確實需要一點舒緩.
不得不讚 !民宿主人真的很好, 由於今日並没有客人入住該單位, 所以她特許我們可以延遲離開.
回民宿前先到超市入貨作晚餐之用, 買好食物, 返回民宿稍作休息, 有的準備晚餐, 有的先作梳洗, 有的開始收拾行李, 總之就係各有各忙 ... 還好時間充裕, 大家可以慢慢整理...
今晚要離開馬德里到巴塞隆納, 早在兩個月前, 已跟學聯訂購咗此段火車票, 為咗慳番一晚住宿, 所以選擇夜車, 又因為唔想坐得咁辛苦, 所以揀咗臥鋪.
火車票 : 53,4€ (對出票時兌價 10.6) + 手續費 H$40 = H$607 (跟官網直接購買差不多)
Renfe 火車官網 : https://w1.renfe.es/vol/index.do (可直接跟官網購買火車票)
夜車於晚上 22:52 係 Chamartin 站開出, 車站好近民宿. 只有三個站的車程, 我哋好早又搞掂晒所有嘢, 係民宿又無所事事, 所以又提早咗出門.
在馬德里的四天行程, 把前前後後買回來的四張地鐵10次數回票剛剛用完了...
唯有 ... 又要主動問路人, 最慘連鬼影都唔多覺, 真係激死...
終於見到有人出行過, 便攞住張火車票上前問人是否當站上車, 好心人話係, ... 那就放心得多.... 但我哋又唔知點入閘, 大拿拿咁大張火車票, 點樣可以隊入個閘口到呢... ? 又一次被考起... 好心人又見到我哋咁疑惑, 便推開那紅色鐵閘, 示意係咁行入去就可以了... 我哋又一次被擊倒... (吓....點解入閘都唔駛查票嘅... !?)
過閘後, 一直向前行, 左右兩旁見到好多個月台, 我哋又唔發現有指示, 亦唔知上邊個月台至啱, 所以走回閘處, 睇下螢幕有無顯示, 可能時間尚早嘅關係, 暫未確實月台編號, 眼見四周又無座椅, 想上月台坐, 但又無電梯, 點解西班牙火車站啲設備可以咁唔完善嘅 ... ? 最驚係上錯月台, 到時候又要搬返件大行李落梯, 唉 ... 真係十萬個唔願意呀... 唉... 但現實歸現實, 若要坐低, 就要搬行李上石梯... 我哋根本再無第二個選擇了...
上到月台, 初次見到晚上 22:00 的天空, 感覺好特別 ...
係月台坐咗一陣, 便走回螢幕下, 睇下出咗月台編號未 , 等咗成 10 分鐘有多, 終於出嚟啦, 但亦好不幸, 我哋去唔中正確嘅月台, 又要將件行李, 再次搬上搬落...
去到 7 號月台, 搵張長椅坐低等火車到來臨... 坐低不久, 居然被我發現在兩個月台之間, 設有電梯通往另一個月台的... 點解宜家先至發現架 ?? 真係再一次被激死...
一路推住件行李, 就一路搵車卡床位, 行人路好窄, 通過時不斷叫人謝謝, 仲要好快手快腳才可順利到達, 但同行朋友郤不知所踪, 我只好在車卡等候她們...
一入車卡, 感覺好焗, 有少少恐懼...
一卡有六個床位, 我哋佔咗四張, 另兩張是陌生人.
朋友還未到, 先來了一對西人夫婦, 西人只懂西文, 而我這個香港代表, 不懂西文 ...
故事發生某一車卡內, 當西婦遇上港女...
西婦一入到車卡, 便用盡她的西文跟我溝通 ... !#$%^#!$%^&*(&%), 唔係嘛.. 難道你以為我識西班牙文, 仲要一輪咀咁講, 我根本唔知你講啲乜, 還好我天生聰敏, 加上你指手畫腳, 我都估到你想點嘅...
原來那對西人夫婦分別入住唔同車卡的床位, 西婦跟我們同卡, 因為行動不便, 但被安排咗最頂層碌架床位, 所以她想調至地面最低層. 但我看她遞給我的車票, 日期顯示是咋日的火車, 我只能用我的身體語言令她知道車票日子有問題, 當時形勢就是... 你有你講, 我有我指, 一直搞咗好耐, 最後我才發現西婦手上那兩張車票是不同日期的, 上面那張是昨天, 下面那張的而且確是今天的, 車卡正正跟我們一樣, 唉... 你個阿婆吖, 真係嘥咗我唔少時間, 最慘全程我企咗入面, 那西婦就企咗出面, 我被她鎖住了, 我的朋友又不知走到那裡, 到現在還未出現, 想出去唞唞氣都唔得, 企係到真係又焗又熱又無助, 阿婆, 你想點呀... ?
又過咗一陣, 我部份朋友出現了, 好像還出現多两位陌生的港女, 這時候, 我没有理會那西婦的存在, 只想問朋友究竟去了那裡, 為什麼失了踪一樣 ? 朋友說那條行人路真係塞到爆, 她們不能前進只可後退...所以到現在才出現 ...另方面, 原來那两位港女是另一卡的, 她們知道我哋一行四人, 加埋佢哋两位, 剛好六人可以一起安心睡在同一車卡, 那就不用擔心跟陌生的外國人困在同一卡, 她們怕出意外. 事情這樣一來, 真係頭都大埋, 我唯有跟大家表明那西婦的要求...到了這地步, 大家嘗試用各種方法, 希望可以令那西婦明白現時大家的想法, 奈何 ... 情況變得更加混亂, 就在極度混亂之時, 又出現了一位的西人, 原來他跟我們同卡的, 這位西人比較年青, 大家都覺得他應該可以幫到我哋解決轉房的問題, 第一句就問那西人懂不懂英文, 但他示意不懂, 我們實在非常失望, 不過那年青西人都用咗少少英文嘗試了解我們的問題, 還好這位年青人也是聰明一族, 他明白我哋各人現時想點, 同時他也願意接受轉房的安排, 現在只欠西婦...
那年青西人便開始他的游說行動, 他先跟那西婦說了一大輪西文, 因為由始至終那西婦還是不太明白我哋嘅安排 (我估), 然後便走到那两位港女的車卡了解一下床位位置, 再向西婦報告, 只要西婦肯答應轉房, 問題便馬上解決.
最後游說行動成功了, 两位港女可以跟我們同卡, 而那對西人夫婦也可以睡在同一卡, 至於那位年青的好心人更自願跟西婦丈夫的床位互調, 終於大團圓結局... 有覺好瞓 !!
其實最終最無辜, 就係我哋四個之嘛 ... 唉 ......
一單剛完一單又起, 更加恐怖的事情來了, 眼見整車都是學生哥, 年紀很小, 約幾歲至十多歲不等, 他們活力十足地走來走去, 有說有笑 ... , 我們的惡夢又來了... 今晚肯定無覺好瞓... 一定被他們嘈死 ... 唉... 再一次證明我哋今云真係上錯車呀...
已比原定開車時間遲了差不多一小時, 火車動也不動, 西班牙火車真的没時間觀念...
快接近淩晨, 火車終於捨得開... 真係夠膽死足足遲咗成粒鐘先肯開車...
快快脆脆安頓好一切, 馬上趕快鎖門熄燈入睡, 明知那群活力十足的少年把我們的車卡重重包圍, 我們也只好假裝入睡, 希望疲累能引領大家入睡...
正當大家靜悄悄地欲睡的時候, 車卡門給陌生人強行打開了......大家被嚇醒, 全車港女都彈起來看個究竟 ... 唉... 原來是查票阿叔前來查票... 唉... 真係比佢嚇死... 早唔查, 遲唔查, 等人哋差不多瞓着嘅時候, 先嚟查... 我哋膽小啲都比你嚇壞...
查票阿叔離開後, 我哋都覺得好好笑... 笑咗一陣, 大家又開始準備入睡了 zzzzz
期後了解, 原來那两港女一直很擔心今晚將跟四個陌生的外籍人仕同卡, 準備好一大埋話題, 諗住由天黑傾到天光, 直至到達 Barcelona, 因為她們害怕那些陌生人會襯入睡後扒走她們的財物, 所以不敢睡... 還好現在跟我們一起, 那就大可安心一直睡到天亮了...
這是我的床位, 頭向近車門, 所以我的右耳整晚不斷給火車行駛時發出的撞擊聲, 搞到"萌"咗. 還有那個窗口, 每當火車行經有光的地方, 就感到刺眼... 所以整晚都在刺眼中入睡 ... 更還有那群活力十足有講有笑的學生哥們, 都不用我說, 大家也可想像得到, 我在夢中周時也聽到他們的歡笑聲... 你說多慘...
好啦, 接近早上7點, 終於要起身啦 ... 火車於 7:36am 便到達我們期待已久的 Barcelona 巴塞隆納了...
沒有留言:
發佈留言