2013年4月23日 (火) 11 - 13°C
離開車廂已急不待伸展肋骨鬆一鬆，「盛岡」晚上氣溫降至１３度，團友馬上添衣，酒店位於市中心，行路都要１２分鐘，離開車駅見雨勢不弱又要拖住行李，決定乘搭「盛岡都心循環巴士」直達酒店門口，全程劃一收費都只係１００円，日本黎講都叫抵坐～
５分鐘車程好快到達酒店門口，雖然只係傍晚６幾點，但天已黑透，加上雨勢越落越密，離開巴士已一支箭衝入酒店，但 CHECK IN 時接待員話去錯地方，好快示意團友入住既酒店就係隔離，點解咁都可以搞錯？真係奇怪？
繼續冒雨過馬路，抬頭一望，團友都齊聲大叫，嘩～ 間酒店好大好靚喎～ 明明網上訂房時見到都幾高級，無可能係頭先間普通貨式，好囉～ 今次終於有覺好訓，發返個好夢～
原來兩間酒店屬同一集團，但級數有別，全名只係相差一個字，唔怪得團友將 NEW CARINA HOTEL 跟 CARINA HOTEL 混淆，搵錯地方都唔出奇～
雨勢仲未停，但唔想留係房間浪費時間，眾團友整理好身上既雨水已準備外出搵食，目標又係火車駅附近既食肆，即係又要行返出去，順便兜兜商場入裡既市超，以快打慢爭取時間～
身上無咗件行李，為咗慳得就慳，決定唔再坐車直接行出去車駅，順道欣賞下盛岡既夜景及熟悉一下酒店周圍既街道～
團友最鍾意行日本超市，驚住飯後唔夠時間，所以先到超市潮聖再安排食飯，如團友所願，超市見有大量當造士多啤梨，實在太多選擇難以取捨，最後買咗４款唔同品牌，留返一連三晚做消夜～
平時係香港絕少食既子薑，唔知係咪日本出產，覺得味道唔錯，今次多食幾啖～
一眼睇晒迴轉帶上來來去去都係嗰幾款，團友實在等唔切，立即拎張 ORDER 紙猛咁剔，食到飽飽為止～
係日本雖然三文魚比唔上吞拿魚咁矜貴，但係香港人既至愛，所以點咗幾碟火焰三文魚滿足一下團友既食欲～
終於輪到日本人至愛既吞拿魚，一碟有齊大中小三種級數既拖羅，印象中好似全場最貴係呢碟～
好少見既蟹糕壽司，所以整咗碟試，食落味道好一般，無乜驚喜，下次都係唔再試新款～
又輪到團友必食之選，大大件既元貝蓋過晒舊飯，賣相真係幾誇張，味道當然係水準之上，仍在回味中～
最後要介紹當然係人人都鍾意既海膽壽司，日本既海膽真係食極都唔厭，每人一件唔駛掙，整件放晒入口就更加盞～
又係眼大肚窄既場面，個個飽到上心口，三催四請你推我讓先至掃清面前既壽司，好在一早預咗行返去，順道幫助消化減減磅～
其實次次食親壽司每人消費都差不多佰幾二佰蚊落樓，以壽司價格黎講都唔算平，不竟係團友既至愛，每次黎日本都要食下先至開心，所以呢個傳統習慣仍保留至今～
回程途中，條街黑猛猛，忽然見有２名男子手持一籃疑似飯團既物體出現街上，跟住向團友講咗幾句日文，其實唔係太明，以為向團友兜售，馬上向他們 SAY NO 了事，之後再向酒店方向繼續行，經過團友討論及後分析，估計該２名男子應是將手上就過期既飯團免費派發給路人，今次認真失策～
因為明早唔駛趕火車，梳洗後又集合團友進行消夜，好味既士多啤梨幾時都係百吃不厭～
沒有留言:
發佈留言