2013年4月22日 (月) 12 - 16°C
今次又係 ANA，雖然東京航班選擇多的是，但此終等唔到航班時間 LIKE 爆既 DELTA 出PROMOTE，唯有向其他埋手，最終又係 ANA，起飛時間都唔差，順便幫團友儲儲分，一舉兩得～
出發前一個月，機位比想像中少，部份酒店需自行預訂，左夾右夾終可落實，可向公司告假～
幾粒鐘機程實在令人雀躍，諗起歐洲要飛十幾粒鐘都怕怕，忽然覺得日本變得好近，順理成章繼續成為團友至愛既旅遊熱點～
根據過往經驗，起飛無耐已開始派餐，所以早餐照舊唔敢食得太飽，但估唔到今次仲有餐前小食，團友「布甸」更老實唔客叫咗罐日本啤，雖然我都想唔執輸叫多罐，奈可晨早溜溜，真係飲唔落，最後乖乖齋飲清水，為未來８天行程保留實力～
半小時後，早上１１點多，小食未消化已見靚靚空姐送上飛機正餐，雖然賣相幾靚，可惜個肚唔爭氣，依然未見肚餓，唔想浪費只好博命食，最終食咗主菜同埋幾啖拉麵，其他原封不動，都幾折惰～
事隔兩年，ANA 機艙設備提升唔少，記得上次煲劇煲到無晒電，今次終於可以邊煲邊叉電，值得一讚 ～
資訊科技一日千里，連機艙電影都緊貼時事，一套一直想但無時間睇既「寒戰」，居然已在機艙上映，機程變得短上加短～
到步第一時間走去買 PASS 出車票，出票比預期順利，好快搞掂，團費又減輕少少～
限期發售既「JR EAST PASS SPECIAL 2013」，比一般５日普通「JR EAST PASS」足足慳成七仟大円，雖然要在１０日內任選３日，對今次行程反而剛剛夠用～
離開成田，習慣搭上較平民化既京成本線，車程約１小時２０分鐘，由「成田空港駅」到「京成上野駅」不設劃位車費只需一仟大円，認真抵坐，所以暫時還未搵到其他可以取代～
 |
| 成田空港 15:47 ~ 上野 17:08 |
首次在港租用 POCKET WIFI 帶到日本，上到車廂已急不及待拎出手機進行網域追蹤，第一時間先向家人報報平安，其後已開始上網，上網再上網，區區一個多小時車程亦唔難過～
放抵行李執返個樣出街開飯，是日晚餐安排團友勁期待既「一蘭拉麵」，足足苦等２年，今晚終於可以一嚐心願食過夠～
相隔幾年無黎東京，淨係上野都變化幾大，車駅人多路多四通八達，團友都兜咗一陣先搵到拉麵位置，麵店２４小時營業，再行耐少少都唔成問題，分分鐘夜晚出來再食宵夜都仲得～
當晚客人唔多，亦唔係網民所講經常人龍，團友唔駛排隊即可入座，服務員安排一行５人平排而坐，雖然去咗咁多次日本，從未試過咁樣既拉麵店格局，初黎報到，真係有點大鄉里～
因為未黎過，又無上網做功課，所以唔知店內規矩，未買票就入去坐，全完搞到錯晒，後知後覺至醒起要係門口自動販賣機補買，可能服務員知道我地呢班大鄉里，依然禮貌款待～
店內只提供單一款豬骨湯底叉燒拉麵，同場另有其他小食，完成買票返回座位，又開始下一輪填表工作，個人要應自己口味點選喜歡拉麵口感及味道要求，簡直係拉麵界既貼心享受～
唔識日文唔緊要，拉麵開始走上國際化，中文英文兩手準備悉隨尊便，食客唔駛擔心語言障礙，一定食到一碗獨一無異既合味道拉麵
～
填妥表格，按下座位內附設既救命鐘，將食券及表格遞向服務員，可以開始等食，順帶一提，每個座位都有自己獨立既出水機，完全滿足晒成班水怪團友～
傳說中既超濃豬骨湯底拉麵熱辣辣送上，大家已忙過不停拍拍拍，相信湯底開始由熱變暖，要馬上襯熱入口，否則後果自負～
在港一定無勇氣飲一口拉麵湯頭，今次終於可以放心喪飲，湯頭味道實在濃厚，雖然多數人都認為湯底係拉麵既靈魂，但我反而鍾意靈魂以外既拉麵，原因好簡單，因為拉麵可以幫我頂肚餓，當然啦，始終最好最好梗係拉麵跟湯底互相配合，咁就最天衣無縫～
基本拉麵份量唔多，所以飲多咗湯，叉燒比想像少，絕對唔係一蘭既主角，隔左２年無係日本食拉麵，食完真係有些少感動～
另外團友叫咗條魚，結果再一次令人失望，始終魚燒餅唔係該店既強項，再一次扣分，更加再無下次～
店內提供三款口味軟雪糕，好想試口北海道牛奶又想試下宇治抹茶，思想掙扎左一陣，都係前後２支全抹茶～
無諗過咁平既雪糕可以咁好食，抹茶味超濃，雪糕較一般挺身，食得出用料十足絕無戲場，這店簡直禾稈冚珍珠，今次錯過唔緊要，下次有機會必定再來～
沒有留言:
發佈留言