2013年4月23日 (火) 12 - 15°C
今日雖然要早起，但心情興奮，早餐後拖住行李由公寓行到「上野駅」入谷口，全程只需５-６分鐘，比去程足足快左一半有多～
已習慣早到車駅，又要等列車埋位，進入車廂第一時間搵位置放行李，左攝右攝大功告成，安心餘下兩個幾鐘車程，時間仲好早，應該幾好訓～
列車會經過福島，莫名奇妙有些少緊張，由於車程唔算短，所以準備好團友至愛既飯團途中頂肚，不失為一個經濟方便既餐前小食，對團友黎講簡直百吃不厭～
終於到達「山形駅」，天氣好到不得了，團友放棄火車駅既 COIN LOCKER，因為再行出少少既巴士案內所有更平更多既大型儲物櫃，為慳多少少所以再走遠少少～
多謝網民提供咁旬既資料，位於山形駅東口「山交バス案內所」隔離，有多款唔同大小尺寸既 COIN LOCKER，重點係全天氣８小時不輪任何尺寸都只劃收費１００円，比起通常價足足平咗４００円，去咁耐日本都未享用過咁平既 COIN LOCKER，又要比個 LIKE～
放抵行李，下一站目的地「霞城公園」，雖然唔係桜花名所１００選內，但勝在交通方便位置超近車駅，最重要當日正值滿開，所以唔去唔得～
開始由「山形駅」西口出發，距離車駅只有７分鐘路程，藍天白雲天朗氣清，行得超舒服，遠遠望到公園城牆一幅幅既桜花花海，團友都同一時間嘩聲四起，桜花多到實在太震撼～
滿開既桜花靚得太過份，只係到達第一個拍攝點已經停咗落黎，團友不繼喪影，影到無諗過想離開～
進入公園入口，被桜花重重包圍，團友開始忙於幫桜花近距離大特寫，不過當時間歇性有風，令對焦出現困難，少不免花時間等到風停才能繼續，偶然持續大風更形成迷你版既桜吹雪，團友又再次尖叫～
已經好耐無黎日本賞桜，今次見到滿開，馬上將出發前既辛辛苦苦拋諸腦後，乜都抵返晒～
起初無諗過會黎「山形」賞桜，計劃一直只朝着日本東北三大賞桜名所草擬行程，如果唔係東北慢熱搞到行程亂晒龍，都未必將所有桜花景點南移，呢段時間就只有「山形県」才可遇到滿開，都唔知好彩定唔好彩～
對於「山形」呢個地方都幾陌生，所以一切從零開始，在短短幾天內不斷網上搵料做功課，四處查探邊到睇桜花最靚交通最方便，最重要唔想影響當晚住宿，因為酒店訂咗係「盛岡」，不能再作任何修改～
在「山形」云云桜花名所中進一步續一研究，皇天不付有心人，終於搵到「霞城公園」呢個「山形城跡」，本以為桜花只開到八成，點不知去到現場卻有意外驚喜～
實在太多桜花滿開，每一個角度都好想影低，團友手機相機齊出動，各有各忙分身不暇，盡在花海之中～
估唔到手機影出黎效果唔錯，不過只能應付近在眼前觸手可及既位置，遠處較高既桜花就要靠大機補飛～
繞咗大半個「霞城公園」，桜花都影得七七八八，暫時只見單一品種既「染井吉野櫻」，雖然顏色偏白略欠粉紅，但滿開程度足以彌補一切～
當日賞桜人仕唔多，成條桜花大道都比團友霸住橫行，影完第一個回合係時候唞唞，走咗去公園人氣較多既小食攤檔，參觀桜花以外既景觀，仲想睇下有咩特色小食可試，口開始痕～
買咗２串賣相勁似魚蛋既東西，見攤檔勁多人排隊，本着人買我買無蝕底，放入口先知原來係蒟蒻，味道咸咸地，其實唔太好食，下次唔再上檔～
食開有條癮，經過蒟蒻一役之後唔敢再上檔，買咗另一檔較正常既霹靂大肉腸頂住先，水準雖然平平，但好過無～
行完公園會進行午膳，所以見到阿嬸新鮮熱辣剛炒好既炒麵都唔敢買，以免影響餐前胃口，期待稍後安排既「山形牛」大餐～
食完唞唞再行下公園另一邊，終於見到幾棵粉紅色桜花，雖然有部份開始殘殘地，但顏色令公園唯一僅有既「枝垂桜」變成主角，好彩有部份仍處於滿開狀態，加上該品種特性向下生長，對於團友攞角度就更加易如反掌，繼續喪影，爽爆～
有部份桜花滿開接近尾聲，少不免被風吹倒地上，花瓣完整無缺，隨便地上執起幾朵，本來諗住帶返香港送俾比朋友當手信，最終都係算了吧～
唔覺唔覺影咗２粒幾鐘，團友收穫豐富十分滿足，決定由另一個出入口處離開，正想收埋相機之際，又被護城河橋上既風景吸引住，又繼續喪影～
影到有點攰，終於捨得走，返回車駅附近全力尋找「山形牛」既踪跡，完成上午行程可以中場休息，好好享受一頓美味而矜貴既地道午餐～
沒有留言:
發佈留言