2013年4月23日 (火) 12 - 15°C
 |
| 鳴謝團友
「布甸」相片提供 |
開飯啦，眾所周知黎到「山形」緊係要食返餐人氣爆燈日本三大牛肉之一既「米沢牛」，但計算過由「山形」去「米沢」來回車程時間都唔短，加上班次接駁又係一個問題，加埋要成幾粒鐘先至食到一餐，好似都幾麻煩，又怕團友舟車勞頓，最終忍痛放棄，取而代之變咗近近地既「山形牛」～
因為餐後要坐２程長途火車到「盛岡」，所以午餐唔敢走得太遠，直接係火車駅附近解決，經過「Tabelog」既協助下，居然搵到間攞正牌食「山形牛」既餐廳，正～
下午２點幾，入咗一間就連烏蠅飛過都聽到既餐廳「山形牛ステーキ＆焼肉かかし」，座位任揀隨便坐，開始擔心餐廳食物質素，記得網站話晒該店已創業３０年，出名提供最好最平既「山形牛」，口啤應該唔差，所以即管括出去試試～
其中一團友因為戒咗牛，睇完餐牌都搵唔到啱食，所以獨個兒走咗隔離既日式料理自行用膳，而餘下團友清一色每人叫咗客新登場推介既「山形牛扒丼」，望落好似幾吸引，而且價錢真係唔貴～
餐廳可能已經打洋，全店只淨待應及大廚前後兩人鎮守全場，４份牛扒丼就慢工出細貨續一送上，正當等開飯其間，團友不繼補水，更加多次示意追添，最終侍應醒目將整壺擺低，索性等團友自己搞掂～
 |
| 鳴謝團友「布甸」相片提供 |
送黎既牛扒丼小巧精緻賣相唔錯，色香味俱全，除咗扒有扒味，估唔到上面那大堆香蔥又香又惹味更加值得一讚～
套餐份量唔多，對女團友只係剛剛好，男仕就未必夠喉，不過唔緊要，借機會可以行到邊食到邊～
厚厚既山形牛扒，廚師細心安排斬件上，方便筷子挾住大啖咬，唔駛刀叉咁麻煩，團友食得好痛快～
「山形牛」初體驗，雖然預咗比唔上「米沢牛」，但對和牛質素都有一定信心，今次亦無令團友失望，但仍有進步空間，食過呢餐反而真係好想下殿堂級既「米沢牛」，希望下次有機會～
LOCKER 位置就在餐廳樓下，餐後又要起程，
取回行李開始跟火車作戰，頭尾連等候轉車時間差不多歷時兩個幾小時，認真夠晒豐盛～
由「山形」要經過「仙台」轉車到新幹線才可直達「盛岡」，首程只係快速火車，不設劃位，所以入閘後已立即走到月台等火車埋駅第一時間霸返個位，否則往後１個多小時有排你受～
「山形」 15:43 – 「仙台」 16:57 （仙山線快速）
好彩搶灘成功，慢長車程開始無耐團友都好精神上網及打機，當轉入直路已抵不住睡魔急 CALL，全團友已訓到天昏地暗不醒人事，呢程火車真係幾好訓～
４１分鐘係「仙台」轉車足夠有餘，拖住行走到另一個月台，雖然短短路程，但被周圍唔少「魔鬼頭舖」薰陶中，勁想停底睇下，差點出事，最後安全大步攬過，上到月台準備今日最後一程火車到「盛岡」～
沒有留言:
發佈留言