2013年4月24日 (水) 13 - 15°C
今早凍凍地又唔趕時間，唔駛再捱便利店麵包，晨早空肚行出車駅，十幾分鐘路程寒意令團友趕走睡魔，首先搵咗稍後要坐車既巴士駅，鎖定位置再安排早餐，以免食得趕頭趕命～
諗住求奇搵間餐廳搞掂就算，估唔到搵到間好嘢，「Pole Shop Cafe」就在火車駅北口，位置好易搵到，晨早無乜客人，坐低馬上點餐～
今次試隻熱狗及例牌一杯醒神熱咖啡，熱狗賣相極得，團友都有讚無彈，咖啡都唔差，食飽開始起程～
又係花期遲開所累，忍痛取消原有既「石割桜」及「岩手公園」行程，餐後走到北口１０號巴士駅等車，巴士準時埋駅，單程７００円３０分鐘車程團友又開始上網，不過遠離市中心不久已失去網域，唯有轉移視線望下車外四周風景～
到達農場已覺天色唔多好，人流更是寥寥可數，都係爭取時間趕快入場，以免稍後天有不測之風雲～
一個超過佰多年歷史既農場，園內面積超大，入場費每人只係５００円，仲抵過單程車費，實在平得太過份～
咁早行農場就好似老人行晨運一樣，團友都借意舒展肋骨，再吸多兩啖新鮮空氣對自己好啲，進入農場，已有２隻驢仔在入口處歡迎遊客，但一直只見牠們低頭食草懶理旁人，真唔識做～
可能太早出動，周圍遊客真係少之又少，除了工作人員好像就沒見其他，地方太大反而令氣氛有點冷清，有點荒涼～
漫無目的邊行邊睇，發現一卡古舊蒸氣火車頭，立即衝過去影相，團友好衰咁見周圍無乜人，靜雞雞爬上火車頭偷偷影相，幾十歲人（包括我）都咁貪玩，真係無得救～
旅遊書中提到火車車卡已改裝成為酒店，房間簡約，更與傳統寢台分別不大，由於有圍欄阻隔，所以團友沒有進一步八卦 ～
跟住入咗去「天文館」打發時間，館內陳列其實都幾簡單，可惜夜晚先可以觀星，繞咗個圈好快又走返出黎～
終於輪到睇綿羊，山坡上見到羊群出沒，就諗起一年前英倫既 COTSWOLD 之旅，最初以為只得幾隻綿羊擺出黎做生招牌，一望之下原來成個山頭都係，數量都唔少，場面都幾壯觀～
因為無乜太陽而天色帶點灰白，沒有藍天白雲襯托下，仍可約略見到遠遠既「岩手山」外形，風景都算唔錯～
「小岩井農場」算是「岩手県」桜花期較遲地區，比起位於市中心既「石割桜」及「岩手公園」更遲開花，所以更加唔會有奇蹟出現，都係叠埋心水睇動物算啦～
走到另一個馬棚，在團友不經意既情況下，居然發現有兩匹馬係到談情，雖然唔識聽，但憑其行為舉止及聲音，團友經過一段時間既觀察及分析，絕對有理由相信牠們正在調情，初次見識到呢種情景，有點不可思議～
整個農場都行得七七八八，又係輪到醫肚既環節，特意安排園內既「山麓館農場レストラン」進行午餐，黎到呢到當然要試試農場人氣爆燈既「蛋包飯」，眾所周知農場雞蛋係該處既主打，所以眾團友都極為期待呢餐午餐～
整份套餐賣相唔錯，田園沙律及洋蔥湯材料來自農場，所以味道份外新鮮，但好似欠缺驚喜，到了主打既「蛋包飯」，團友小心把蛋皮揭開先行拍照，影夠才慢慢享受這份配上茄溶塾低既農場半熟蛋，不過，可能期望過高，總係食唔到一丁點感動，雖然蛋很滑，但食唔出蛋香，蕃溶都係一般，食唔到以前北海道食過既鮮味～
總括黎講，整份套餐都令團友有點失望，可能早前網上做功課時見到太多網民分享都係正面食評，期望過高所致，最終團友用盡食力都只能完成大半份量，居然出現食唔晒既場面，真係前所未見～
最後衝刺，刻意安排膳後黎過瘋狂購物大行動，睇下有無機會追加甜品消夜，雖然見有多款芝士蛋糕擺在眼前，但左睇右睇都係買唔落手，最終敗走而回～
外面開始落起雨來，急步衝向最後一站既「ミルク館」，除咗避雨，團友仲想試下該農場出產既牛乳類製品，打握時間先來一瓶「小岩井牛乳」，細細樽份量剛好，不過飲落奶味比想像中淡，可能係現時日本大賣既「生牛乳」，奶味始終比唔上香濃既傳統牛奶～
驚死走寶，臨走仲叫咗杯「農場軟雪糕」，希望可以幫農場挽回少少分數，雖然已經好飽但都括咗出去，點不知買咗反而有些少後悔，估唔到軟雪糕味道可以咁普通，團友再一次失望，還是走吧～
準備離開農場，終於下起大雨來，雨勢仲越落越密，橫掂留係室內要等雨停，就不如索性快步跑出巴士站等車好過～
等車期間，遇到２名「港男」正準備入園，知道團友剛出園便順道問問意見，大家本着同鄉關係亦老實不客氣表明立場，估不到出自團友口中既「答案」反而令他們卻步，雨勢越來越大，巴士正好駛到，團友當然襯機會逃脫，走人了事，見他們一臉苦腦都幾搞笑～
沒有留言:
發佈留言