28 May 2012 (Mon)
今日行程好輕鬆，包咗架車漫遊 Cotswolds（Lupton Guest House £55 / 位），見識一下英國最具代表性的鄉村景色。
由於噚日消耗咗太多體力，唔想再次為難自己，所以約好張姐早上 8:30am 揸車直接到 Apartment 門口接我地。
估唔到大家又如常地雞啼咁早起咗身，個個仲好精靈，見食完早餐距離出發仲有大把時間，咪索性上住網，睇住電視等車來。
等到差不多 8:30am 大家咪施施走到門外等車來，免得人家等候。
倫敦早上氣溫都幾凍，係門口企企下都有少少寒意，無諗到張姐住得咁近都會遲到，仲驚住自己記錯時間！
其實唔講大家唔知，今次入住的 Apartment 都係張姐介紹，房東先生係張姐朋友，所以我無擔心過張姐會迷路。
成班人就咁企係門口一直等，一直等，張姐比原定時間遲咗十幾分鐘，終於見佢既盧山真面目啦，久仰久仰。
好啦好啦，跟張姐打過招呼後，馬上開始我個人好期待既 Cotswolds 鄉村之旅，開車啦～
當日天氣好好，陽光普照，藍天白雲，無宗教信仰都想學人感恩，真係天都幫埋我地啦。
張姐話今日係星期一，倫敦市區會好塞車，比定心理準備我地，我覺得佢係比定心理準備我地係車大覺訓至真！哈哈～
張姐一路開車，一路講解，間唔中經過某些旅遊景點都會叫我地望下，雖然講完都唔會記得，但睇得出張姐真係好專業。
今日行程無任何特別要求，一切由張姐發辦，我地總相信一個當地專業導遊必定好過一本旅遊書既精心推介～
車輛駛至公路，張姐都開始靜落黎專心揸車，而我地都跟住靜落黎專心訓覺，始終都係抵唔過睡魔既誘惑。
全程路上大家訓下又醒下，直至將進入下個景點，張姐又開始介紹，兩個鐘既車程坐到屁股都硬晒，終於到達今日行程的第一個小村落 Woodstock。
至於 Woodstock 第一個景點，就係英國前首相邱吉爾的出生地 Blenheim Palace。
因為事前無做過任何資料搜集，所以我地都係經張姐介紹先知道原來呢到咁出名，仲係世界文化遺產之一。
由於 Blenheim Palace 唔係今日主把行程，所以我地無安排入去參觀，只係企係門口影張到此一遊相，叫做打聲招呼。
其實張姐都有叫我地同保安哥哥講聲行入少少影張以 Blenheim Palace 為背景既相，但只見保安哥哥工作忙個不停，唔想打擾人家，索性就咁係門口影張相算啦。
影完相上返車，張姐車咗我地去另一邊市中心，其實車程好近，泊好車再帶我地走到當地好出名既 The Bear Hotel。
張姐話呢間酒店好有歷史背景，一定要同大家介紹一下，所以我地五個鴨仔馬上企定定聽故事～
張姐話該酒店早於 13 世紀已經係一間 Coaching Inn（即近似古代既客棧），唔知轉咗幾多手經營至今，後期仲被美國某酒店集團收購改名名為 Macdonald Bear Hotel，繼續經營。
我地呢班鴨仔跟張姐繞住酒店行咗一圈，聽咗好多有關酒店既史蹟，總括黎講只有一個＂勁＂字黎形容，酒店仲可以保存到現在，已經難能可貴。
張姐話酒店既具體建築外貌基本上跟以前變化唔大，呢條咁濶既走廊通道，原來以前係比馬車專用架，所以較其他走廊寬敞。
仲有該酒店既 coffee shop，廳內的所有擺設及間格都保存得跟以前一模一樣，無乜變過，就連英國前首相邱吉爾當時都經常幫襯。（可惜我唔記得影相）
就憑酒店外觀睇落一啲都唔似有七佰幾年歷史，但絕對充滿鄉村味道，其實酒店真係幾靚，住唔起都可以四周影下相，滿足一下。
做完鴨仔，張姐話可以解散，約定集合時間及地點後，我地開始市內四散觀光影相。
走到大街旁，雖然對店舖內的商品興趣不大，不過齋睇廚窗設計及擺設，都幾吸引。
Cotswolds 每一個村落都會將當地最主要既街道統稱為 High Street 高街，這條 Woodstock 的 High Street，可能係平日關係，眼路人唔多，但馬路旁卻泊滿晒車。
唔講唔知，Cotswolds 每個大大小小既村落都會有屬於自己個別的郵局，教堂，酒吧，有齊呢三項設施，即可成為一個獨立既社區，所以每到一處地方，這些都是隨處可見。
準時返回車上，張姐繼續向下個目的地進發，完成第一個景點之後，令我更加期待下一個景點 - Great Tew，張姐說這是她最最最最喜愛的地方～
沒有留言:
發佈留言