2012英倫 Day 3.2 - Great Tew @Cotswold UK

28 May 2012 (Mon)

向着 Great Tew 進發，張姐好好人，知道我地鐘意影相，偶爾見到路上有靚既風景，即主動停抵比我地落車影過夠，真係好感謝～

仲話如果可以早兩星期到步，英國好多郊區隨處都可以見到一大遍一大遍既小黃花，對於我地呢啲花痴，簡直聽到都開心，不過，諗落又好似有點可惜～

雖然今次只係遇上花期尾聲，不竟於毫無心理準備的情況下，見到少少都覺得係賞賜～

二十分鐘車程，我地終於到達 Great Tew，落車以後，乖乖咁一直跟住張姐沿路行，估唔到周圍可以咁靜，無車聲無人聲，就連人影都唔多覺，究竟呢到有無人住架？呢個地方有點與世無爭，與世隔絕，反而令大家更加喜歡～

開始入村無幾耐，已經見到一個破破爛爛既電話亭，完全可以想像呢個村落有幾樸實，有幾古，有幾舊，真係好想快快加速入去深入睇睇～

走到 Great Tew 的心臟地帶， 張姐又開始向我地講解介紹，不過呢。。。對於其內容相信大家已經忘記得八八九九架啦～

雖則話係心臟地帶，但眼前只見一條沙塵滾滾既大街，旁邊有幾棟超古舊既建築物，無意之間，又比我地見到這條村唯一的郵局及酒吧。地方雖小，無錯，始終總有一間係左近～

都話無乜心肝聽阿張姐講歷史架啦，返來要寫 Blog 先至的起心肝搵資料，原來呢間酒吧 Falkland Arms 已有六佰幾年歷史，仲係米芝蓮星級推薦，又係 Cotswolds 碩果謹存的傳統酒吧，真係來頭唔少～

 



其實張姐都叫我地入去參觀一下，但齋睇唔幫親又覺得唔係幾好意思，好似好肉酸咁，所以連門口都唔敢入，只係影張門面相算啦，依家咪知後悔囉～ 實在太遲啦～

所以呢，大家如果有機會去到 Great Tew，千其唔好學我地咁笨～

沿路一直行，見到一遍斜坡草地，望落去好有歐洲風情，四周圍繼續保持寧靜，依然未見有路人出沒，又係人影都無隻，唔知去晒邊～
 

 

開始見有村屋，但呢間外型普普通通，建築設計上較為傳統，外觀未見吸引，唔係我地今次前來的目標～
 

 

再向前行，終於有間較為似樣，好有古舊味道，石屋的三角屋頂，煙囪，仲有兩隻窗及門，再加上門前那個花園仔及圍欄，正正是我們想要的～

 

 

之後跟張姐跨過另一遍斜坡草地，軟林林的，雙腿踩得好爽，好舒服，再向下走，經過一條秘道，又見到其他古舊村屋～
 

 

行行下，張姐突然停係一埋大石旁等我地，原來佢想同我地介紹呢埋係 Great Tew 既特產 - 鐵礦石，用來起屋及其他建築工程，咁有價值，唔明點解會隨街擺放？！
 

 

再向前行，終於見到 Great Tew 最具代表性既 Bee Bole Cottage，估計至少有幾佰年歷史，就咁睇個外觀已經令到我地殺了不少菲林～
 

 

繼續行繼續睇，沿路見有好幾間古怪做型既村屋，外型相當特別，我地好似走咗入去童話故事書裡面，非常有趣～

張姐知我地會影好耐，唔想阻＂大家＂時間，隨即教埋回程路線，索性放我地係到影夠睇夠先至返回停車處會合，呢個簡直係明智之舉，舉腳贊成，Yeah～

 

 

 

 

 

 

 

我地周圍行來行去，都唔知自己行咗去邊一到，總之就影過不停，還好 Great Tew 地方唔算大，唔會迷路，但依然唔見有其他人影，呢條村都幾古怪～

最後仲比我地發現羊群出沒，好驚喜，好有 Cotswolds feel，又影咗幾張相，畫上 Great Tew 既完美句號，非常滿足～

 

到停車處會合張姐，又繼續向下一站進發，停不了的步伐，停不了的行程，好爽呀～