28 May 2012 (Mon)
又過咗 30 分鐘，張姐車咗我地去一個被譽為英國中世紀最漂亮城鎮之一既地方 - Burford，驟眼望條街都幾熟口臉，好似係旅遊書見過，車停泊好後，馬上落車睇睇～
至於呢個景點，其實我都唔知張姐當時有無介紹過，又或者我無留心聽講，經常左耳入右耳出都唔定，好似真係無乜印象～
今次活動範圍就係呢條高街 High Street，可以講話一眼睇晒，全鎮都係依山而建，所以條街又長又斜，兩旁仲開咗唔少餐廳，酒店，商店，加上建築物外型頗有特色，十分吸引，周街遊人熱鬧非常，比起之前兩個景點確實有天淵之別～
花了半天行咗兩個景點，話咁快又要開餐，跟張姐暫別後馬上開始我地既自由時間～
為了爭取有咁多得咁多既觀光時間，我地早一晚已在超市買好三文治及蘋果，加埋早上煮熟幾隻雞蛋作為是日午餐，真係既豐富又簡單，其實最終目標只係唔想花太多時間用作午膳啫～
隨意係附近搵個有眼遮頭既地方，馬上開餐，團友隨即從背囊取出所有食物，不過。。。一個不留神，其中一個蘋果從膠袋跌咗出來，由於我地開餐位置位於大街的較高處，加上大家當時反應慢，手腳又較遲頓，最終我地唯有呆呆地睇住個蘋果由手上，再隨着地形由上滾至下方，本以為蘋果會好快停係馬路中，仲諗住快快脆行去執返，但可能馬路始終都係比較斜，咁啱條馬路又無乜車經過，最終那個蘋果滾咗好耐，好耐，好遠，好遠先肯停，仲要停係對面馬路停泊的車底下，真係唔知點算好，究竟執定唔執好？最搞笑係我地全部居然全神貫注金睛火眼好齊心咁一直望住個蘋果滾到對馬路，直至停底那一刻，大家都大笑起來，點解個蘋果可以碌到九丈遠，仲要碌到人地車底，笑完一輪，時間無多，都係算啦，繼續開餐把啦～（可能我文筆形容得唔夠生動，但諗返起呢個場面，真係笑死成班團友）
蘋果由拍攝位置一直滾至對面馬路，即係相片較中心位置那加藍色的私家車車底，當時真係覺得好搞笑。
午餐好快食完，又開始四處行下睇下，我地順着大街向下走，Burford 較多商店行下，雖然都唔係我地杯茶，但望住啲咁得意既建築物，連條行都覺得好好行～
慶祝英女皇登基六十年週年，整個英國大小地方，建築物也好，大街也好，總之隨處都可以見到英國旗喪卦既現象，可想而知女皇係幾咁受當地國民所尊敬所愛戴，令到成條大街望落去增添不少節日氣氛～
行咗半條大街，又見到郵局，真係總有一間係咗緊，位置仲正正係正路中心，真係無所不在～
唔知呢間餐廳還是酒店？建築外牆超靚，行過見到馬上影底留念～
當然唔少得賣記念品既舖頭啦，不過我地睇都無睇，馬上閃過～
行到差不多街尾，又要開始搵厠所，明明之前都聽到張姐話呢附近有厠所，當時坐係車上都仲見到個厠所牌，點解依家重覆行咗幾次都見唔到既？唔知係咪人越急，眼越盲，最後仲要集合幾位團友既力量，先至搵到呢個高街唯一一個收費的公厠，可能個牌釘得太高了，唉～
這條街的最大特色，就係成條街都係斜上斜落，所以行完向上那邊街，轉個頭，我地又要開始上返山啦～
真係唔同角度，就有唔同構圖，這邊望落山風景又唔同晒，遠遠可以看到山腳有一大遍的小黃花，景觀亦相當唔錯～
差不多花了前後一小時，又係時候要離開，因為仲有其他景點等緊我地，要向 Burford 說聲後會有期啦～
沒有留言:
發佈留言