2011北海道Day4.4 - 食在小樽@回転寿し和楽 小樽店

2011年8月7日

 

[ 旭川 18:00 ...... 札幌 19:20 ]

 

順利返回旭川到酒店攞返行李, 再向小樽出發, 有成個鐘時間來回, 今次終於可以唔駛趕到氣喘 ~

[ 札幌 19:26 ...... 小樽 20:09 ]

 

四天的富良野美瑛周遊劵用埋呢程亦到此為止, 雖然我哋只係用咗三日, 但比起散買車票, 已經幫我哋慳咗唔少 ~

今次會係小樽逗留兩晚, 唔想花咁多錢係住宿方便, 所以我哋揀咗好經濟又近駅前的 [ 小樽グリーンホテル ] Otaru Green Hotel, 雖然要成 8 點幾才到達小樽, 但酒店位置好近車駅, 拖住件行李, 都只係花咗 5-10 分鐘已經見到酒店門口 ~

上到酒店房搞咗一輪, 開始肚餓, 又要出動搵食 ~

因為小樽實在太多美食, 手上資料都有多間選擇, 所以問咗團友有乜想食, 好快聽到 [ 迴轉壽司 ] 四個大字, 所以順理成章, 決定去 [ 回転寿し和楽 小樽店 ] ~

[ 和楽回転寿し ] 係北海道有五間分店, 當中以 [ 回転寿し和楽 小樽店 ] 的食評評分最高, 所以食物質素, 可想而知 ~

 

 

由酒店行到去壽司店, 還未夠 9 點, 但已見十多人還在等位, 我哋唯有等埋一份, 向店員要求住梳化位, 希望快啲可以有枱 ~

 

 

等咗十多分鐘, 終於有枱, 這時距離壽司店關門時間還剩一小時, 所以大家都二話不話, 快快開動 ~

有團友負責從吧枱攞壽司, 有團友在柯打紙點壽司, 有團友在影壽司, 有團友已開始歎壽司, 大家真係各有各忙 ~

 

 

我就係負責攞同食, 所以今次無乜點影相, 唯有借借團友 [ 布甸 ] 的相片post 出來, 同大家分享 ~

這款酸薑醃得好好味, 連我平時唔多食薑的人, 今次都食咗好多 ~

 

 

當晚食咗部份較平的壽司打底, 隨後亦點咗好多好多較貴的壽司, 正所謂一分錢一分貨, 所以貴的壽司真係無點錯 ~ 好味 !

 

 

 

 

團友被隔離枱上的蟹湯吸引住, 隨即馬上點了兩客試試, 可惜我一向對蟹湯興趣不大 ~

 

 

係日本第一次見有這樣的牙籤, 比起我們常用的木製牙籤, 感覺好似比較衛生 ~

 

 

由於時間關係, 最後一行五人只花了 35 分鐘完成今晚的晚餐, 好似食得快咗少少 ~

 

 

今晚埋單總數食咗 31 蝶, 8914 円, 平均每人約港幣 180 元, 其實都頗滿意, 不過若再加多三份一價錢, 我哋便可以品嚐一頓水準及質素都相當超班的 [ 旭寿司 ] 或 [ おたる 政寿司 ], 唯有留返下次啦 ~

 

今晚又要早睡, 明天又要早起, 坐巴士向 [ 積丹半島 ] 出發 ~

續 ~