2011年8月7日
天氣真係好熱, 旭川市中午時份有成 32 度, 就北海道呢個鬼地方而言, 已經係全年最熱嗰幾日, 真係熱得有點過份 ~
旭川最出名係拉麵, 除咗拉麵, 都係拉麵, 所以去咗 [ 食べログ ] search 咗一間評分幾高, 位置又幾方便, 又要從未過去的拉麵店, 最後揀咗 [ 蜂屋 ].
[ 蜂屋 ] 旭川市內有兩間, 其中一間叫 [ 蜂屋 本店 ], 兩間比較雖然呢間評分較高, 但店舖位置亦較遠, 所以我揀咗另一間 [ 蜂屋 五条創業店 ], 話晒係創業店, 水準都應該有返咁上下 ~
注意注意 : 唔知點解 [ 蜂屋 ] 的官網網址, 唔係成日都可以成功 click 到入去, 所以我都係建議大家直接參考 [ 食べログ ] 入面 [ 蜂屋 ] 拉麵店的資料算啦 ~
由 [ 旭川駅 ] 行去 [ 蜂屋 五条創業店 ], 足足花咗 15 分鐘, 太陽非常惡毒, 大家都行得身水身汗, 原來 [ 蜂屋 五条創業店 ] 正正位於 [ 5。7 小路 ] 入面.
呢間拉麵店有兩個門口, 呢個係其中一個, 因為實在太熱, 所以馬上走入店內涼涼冷氣降降溫 ~
原來呢間拉麵都幾出名, 牆上掛有好多名人簽名, 睇嚟我哋都唔駛再擔心呢到啲食物質素囉 ~
入去坐低, 又係勁飲冰水, 雖然室內冷氣唔係好夠, 但一諗起出面有個毒太陽, 依家我哋坐係入面已經好滿足架啦~
個人認為, 通常係餐牌排第一位, 估計都係當店之選, 最為人氣, 所以今餐我揀咗 [ 醬油拉麵 ] 餵勞自己 ~
開放式廚房, 食客可以睇住上面, 一目了然 ~
我哋一行五人, 分兩張枱坐, 而同枱的兩位團友分別點咗餐牌排第二位 [ 鹽味拉麵 ] 及第三位 [ 味噌拉麵 ], 決定叫齊三款, 來個拉麵大比拼 ~
馬上送上三碗又大又熱的拉麵, 先來互相試試三種唔同味道的湯底, 試過味後, 我就唔客氣, 馬上開動面前那碗極度誘惑的旭川拉麵 ~
拉麵好味就唔在講, 但我真係未試過食拉麵可以食出汗, 今次真係第一次 ~
唔知點解碗拉麵食極都可以保持咁熱, 再加上室內冷氣唔夠, 所以我哋個個都邊食邊流汗, 除咗面上有汗, 我簡直離譜到連雙腳都在冒汗 ~
咪睇呢幾碗拉麵賣相普通, 外貌平平, 正所謂唔食唔知好味道, 食完先知到無走寶, 嫌我長氣都想講多次, 呢碗拉麵真係好好味 ~ 超級推介 !!!
最終, 今次拉麵大比拼的結果係由 [ 鹽味拉麵 ] 以五票大勝, 真係無諗過鹽味湯底可以咁好味 ~ 記住嚟呢間, 一定要試下呢碗 [ 鹽味拉麵 ] 至好走呀 ~
食拉麵又點可以少得餃子呢 ? 呢個簡直係我哋嘅指定動作, 好味 !!!
我哋由另一個入口離開, 見到仲有人等位添 ~
因為昨日踩單車踩到過晒火位, 所以被迫修改行程, 放棄 [ 四季彩之丘 ], 唯有順延今日下午補返, 食完拉麵, 我哋又要趕路, 行返去 [ 旭川駅 ] 再坐車去 [ 美馬牛 ].
太陽依然惡毒, 陽光比之前變更加猛烈, 我哋又要苦行 15 分鐘返回車駅, 成個人越行就變得越㷫, 再加上連日來都同樣咁晒住太陽帶着汗水係咁行, 好驚會熱到中暑, 所以我主動向眾團友提出一個動議, 看大家有無意思取消 [ 四季彩之丘 ] 行程, 直接坐火車早點到 [ 小樽 ], 雖然這番話出自我口確實有點唐突, 但其實只要有一位團友堅持, [ 四季彩之丘 ] 的行程可以馬上繼續 ...
最終, 我們都係繼續向 [ 四季彩之丘 ] 出發 ~
續~
沒有留言:
發佈留言