2011北海道Day4.3 - 四季彩之丘@美瑛

2011年8月7日

[ 旭川 13:38 ...... 美馬牛 14:23 ]

 

過咗一陣火車冷河, 體力可以恢復起來, 再次精神亦亦咁向景點出發 ~

[ 美馬牛駅 ] 係一個設備簡陋一眼見晒的無人車駅, 駅內有個洗手間, 主要都係方便我哋呢類旅客 ~天氣依照酷熱, 抬起頭看, 我哋又要再次挑戰這個惡毒太陽, 團友們, 好好做定心理準備 ~

離開車駅, 向前行再轉右一直走, 沿路再留意四周圍的路牌指引, 途中經過 [ 美馬牛小学 ], 行足 30 分鐘, 便到達 [ 四季彩の丘 ] ~

都係比較鍾意日本的鄉下地方, 村民又友善, 馬路又少車, 空氣又清新, 感覺好自在 ~

 

 

開始走了不久, 已經見到一大堆 [ 牧草捆 ], 借意停低影下相, 可以唞下 ~

 

 

經過 [ 美馬牛小学 ] 都無影相, 諗住黃昏回程時先再影過夠, 因為 [ 美馬牛小学 ] 以黃昏景最為聞名 ~

行咗差不多 30 分鐘, 好彩沿路都無乜上斜位, 除咗酷熱及流汗, 至少我哋唔駛行到喘晒氣 ~

見到 [ 四季彩之丘 ] 呢個指示牌, 就知道目的地距離我們不遠了 ~

 

 

企係呢個位置望向 [ 四季彩之丘 ] 四周的田野, 感覺很舒服, 又令我諗起昨日單車之旅係拼布之路看到的迷人風景 ~

 

 

終於到達門口, 影完張相, 馬上走入去參觀一下 ~

 

 

雖然呢個地標唔係太過吸引, 但始終都要同佢影張到此一遊相作為紀念 ~

 

 

又開始賞花行動, 跟今早超震撼的 [ 向日葵之里 ] 相比, 這處確係有點遜色, 但一場來到, 都要四周圍行下影下, 不枉我哋花咗 30 分鐘出力又出汗咁行嚟 ~  

 

 

 

 

 

看到這遍花海, 又再一次失望, 今年用花的顏色實在太娘, 連我呢啲花痴都覺得拼出來的畫面唔夠吸引 ~

 

 

 

行去另一邊看看, 都是沒什麼驚喜, 影多幾張都可以提早收工 ~

 

 

 

這景點比想像中早咗完成, 還剩一小時逗留, 我哋嫌時間太長, 唔知係到有乜好做, 嘗試考慮轉搭早一班火車離開, 但只剩 35 分鐘, 時間又好似好趕, 所以我哋又來一次表決, 終於大家都決定趕搭早一班火車, 隨即馬上離開, 急步回駅 ......

沿路又係行得急急趕趕, 就連說話都不敢多講, 所以經過 [ 美馬牛小学 ] 都不敢停下影相, 驚住錯過這班火車, 所以大家一口氣咁行返車駅 ~

將近走到駅前, 我哋又見到兩位着晒高根鞋的美少女問路, 望樣以日本人, 但講嘢好以外地人, 我答佢地要行成 30 分鐘先至到 [ 四季彩之丘 ], 佢地當堂面色一變, 唔知繼唔繼續行去好, 之後我哋都無理佢地, 又再繼續急步走向火車駅 ~

好在到達車駅仲剩 5 分鐘, 終於鬆一口氣, 眾團友已急不及待馬上補水, 我都走到附近的水機補給一下, 成世人都未試過一口氣咁飲晒成支 500ml 的寶礦力, 其實呢點都唔誇張, 最誇張都係我面上啲汗可以不斷咁流, 抹極都仲有, 汗流得好快, 快到想接都接唔住, 之後成塊面都仲出晒鹽, 何解流汗可以流得咁得人驚 ~

[ 美馬牛 16:10 ...... 旭川 17:02 ]

 

續 ~