日期 : 18 Jun 2010 (Fri)
最後一天, 終於可以走去酒店對面嘆下個早餐, 由第一日開始, 已經想食, 只係日日都唔啱時間 ... 真係無緣 ~
叫咗份好經濟嘅早餐 set, 杯咖啡好好飲, 個朱古力飽好新鮮, 真係一路食就一路讚, 同時亦埋怨點解永遠都係咁後知後覺嘅....
因所剩時間不多, 但想做的事情郤很多 ... 快快脆脆食埋個早餐, 趕埋半天的行程 ...
首先行咗去 Plaza Catalunya 嗰間 Camper, 可能時間尚早, 仍未開舖, 唯有企係門口等開門 ...
今朝已經等到九點先至落樓食早餐, 依家又再等多十分鐘先至到十點開門 ... 唉 ...
終於見到 Sales 姐姐返工, 見到我哋四個企係門口等佢開門, 感覺好像怪怪的 ...
原先只係一位朋友要買一對鞋, 預先已睇啱款式, 一心諗住買完即閃, 仲有時間到附近的景點走走, 點不知大家睇吓又揀下, 擾攘咗一輪, 最終演變成三個人買三對鞋, 仲要睇中同一款, 搞到唔夠分, 咪叫 Sales 姐姐幫我哋查下有邊間較近的分店有存貨, 起初店員提供咗一間較近的分店有貨, 但我哋又唔識去, 最終決定走到曾經去過嘅 Passeig de gracia 感恩大道那間分店, 條路比較遠啲, 行咗幾耐, 去到該舖都已經十一點幾, 浪費咗好多時間 ...
呢間 Camper 比較大, 款式亦較多 ... 諗住買完就走, 點不知睇睇下, 又睇中多一對, 最終前後買咗兩對, 真係大豐收兼大出血 ...
同時間, 另一位無收穫嘅團友, 眼見我哋燒銀紙燒得咁開心, 佢都想燒埋一份, 見女裝款式唔係佢杯茶, 就走咗去望下啲男裝, 又真係比佢睇中, 奈何最細嗰 size 斷晒碼, 本應都已心死, 正當其他團友等緊我結賬及處理退稅嗰陣時, 又比佢地發現到個 sales 哥哥著緊嗰對幾好睇, 最搞笑係連那位 sales 哥哥都知道佢哋討論緊自己嗰對 Camper, 當然順理成章咁向我朋友介紹, 仲話著落好舒服添, 其實 Camper 有邊對著落會唔舒服先得架... sales 哥哥馬上幫朋友查有無男裝最細 size, 係咁查, 係咁查, 係咁查 ... 經過 sales 哥哥一番嘅努力下 ... 最終都係無啱 size, 但真係好感激 sales 哥哥的殷勤服務. 在朋友非常失意嘅同時, 我跟其他朋友就你一抽我兩抽咁一齊撤退啦 ...
返回酒店途中, 亦嚟個"急掃英國宮", 諗住係超市掃返啲手信返香港, 因為西班牙除咗黑毛豬外, 確實無乜特色嘅本土食品可作手信之用 ... 所以狂風掃落葉咁將啲餅乾, 薯片, 咖啡等等, 乜都狂掃一通 ...
買唔到 Camper 那位朋友, 最終買咗盒紙包 Sangria (0,65€) 嚟補償一下 ... 呢款真係又平又好味 ...
離開超市, 又走到酒店斜對面的 Mercat Sant Josep 聖約瑟市場, 因為已經時候唔早, 求奇揀間較近嘅舖頭入貨, 該店提供試食, 試啱試夠先買, 但我哋時間無多, 唯有買幾包已真空包好嘅方便裝走人 ...
西班牙風火腿有分白毛豬及黑毛豬, 價錢有平有貴, 視乎品種及品質而定, 我哋買嗰幾款價錢都只係由5,x€一包起, 有啲 1x€, 再貴啲都係 2x€, 價錢打在包裝上, 明碼實價, 揀啱至買, 若有充分時間, 也可以即試即切即包, 適隨尊便 ...
終於搞掂埋啲手信, 眨下眼已經下午一點, 已經再無時間去 Palau Guell (桂爾宅邸, 世界遺產), Gran Teatre del Liceu (利休劇場), Monument a Colon (哥倫布紀念塔) 及 Rambla de Mar (海上蘭布拉斯) 等景點 ... 但無時間之餘, 都仲要搵咗間快餐店落腳, 三扒兩撥醫飽個肚, 馬上返酒店執拾行李 ...
起初諗住帶個 26 吋喼足夠應付今次嘅行程, 原來買下買下, 就買咗咁多嘢, 花一輪時間將所有戰利品塞爆個喼, 馬上起程 ...
今日17點飛機, 仲要預多少少時間係機場搞退稅, 興幸機場巴士站又係好近酒店, 大家繞過繁盛嘅街道, 左閃右避咁拖呀拖 ... 拖呀拖 ... 拖呀拖 ...
機場巴士 Aerobus :
機場巴士班次好密, 每隔五分鐘就開出一班, 到車上向司機買票即可 (單程 5€ / 來回8,65€, 不用與 T-10 共用, 但剛在網站見最新價為 5,05€ / 8,75€ ) 我哋坐兩點多那班巴士, 半小時後已到機場, 有足夠時間搞東搞西了 ...
到達機場, 首先處理退稅事宜, 退稅蓋章處位於離境大堂最左邊, 設於一個很隱蔽嘅角落, 記謹留意 TAX FREE 商標 ...
第一次係機場用自助登記服務機列印登機証, 但搞咗好耐都未能輸入正確嘅出發地, 可能又係大鄉里出城, 服務機提示要輸入三個英文字母, 我哋理所當然咁入咗BCN, 但系統無資料顯示, 再入 HOL (Holland) 又無, 再試 NET (Netherlands) 又無, 搞咗好耐, 最後先至諗起 AMS (Amsterdam) 終於成功, 一齊叫好 !! 都唔明點解最尾先至諗到 AMS ... 哈哈哈 ...
出咗登機証, 隨即排隊寄運行李直達香港, 順便過海關進行離境檢查, 通通都好順利 ...
進入禁區後, 又有件烏龍事發生 ... 唉 ... 枉我一直以為退稅單蓋好印後, 再到禁區內的銀行就可提取退稅款項, 好不幸 ... 原來我一直都錯 !! 其實當時朋友也跟我說過, 她聽到海關人員有提及銀行就在下層, 唔知點解我又錯誤盲目地堅信是在禁區內的銀行處理, 所以為免擔誤時間, 當一踏入禁區便立即向詢問處查問退稅銀行的位置, 當海關人員告知銀行不在這裡的時候, 我確實有點強烈的罪惡感, 興幸時間充裕, 尚可補鑊, 立即再追問海關人員能否容許再次進出入境, 待處理銀行退款後, 馬上回來, 誓估唔到得來的回覆竟是一句 : I don't know !! 真係有點驚訝 ! 唔知點解詢問處居然答唔到呢條問題 (呆) ... 心情就變得好似熱鑊上的螞蟻一樣, 唯有繼續發揮鍥而不捨, 誓不擺休的精神, 走回之前剛剛通過的海關檢查人員再問問, 今次搵啱人問, 在她一聲 "可以" 之後, 我哋二話不說, 再加滾水淥腳咁離開禁區, 尋找退稅銀行的位置, 退款的程序頗順利, 完成後再次通過離境檢查, 又再次踏入禁區, 任務完成, 終於可以卸下擔子 ...
出國旅遊, 原來真係有好多嘢都預計唔到, 經過呢次經歷, 我又學咗好多嘢啦 ...
入到禁區, 各團友出力地出盡身上餘下碎銀, 到了買無可買的地步, 才開始走到遠遠的登機閘門, 靜待上機 ...
到閘口等待上機的一刻, 突然感謝自己足足花了一年時間用心籌備這次平安, 順利, 開心, 豐富的旅程, 更感謝幾位朋友, 忍受我這十天的指指點點 (基本上她們早已習慣), 這次真是一個不錯的體驗, 大家過得相當愉快 ...
由巴塞隆納登機, 先到阿姆斯特丹轉機再返回香港, 回程比去程縮減一小時多機程, 真開心 ...
終於要上機啦, 再一次品嚐這份極具荷蘭特式的茶點, 這次比上次好吃得多 ...
飛機上看到的雲層很有趣, 奈何機窗極度污濁, 真係有少少扣分 ...
兩個多小時的機程, 轉眼已過, 到達阿姆斯特丹機場要再等兩小時轉機直返香港, 見有足夠時間, 到處走走, 機場四周擺放大量新鮮鬱金香, 大小風車及木屐擺設, 大開眼界 ...
強力推介 : 今次上機全程穿上拖鞋, 裝束比去程舒服得多 ...
這班飛機, 終於可以見多一點香港人, 感覺開心又興奮. 找到位置後, 居然發現跟我們由巴塞隆納出發, 並坐在我們附近的西班牙家庭, 跟他們一家幾口又再次碰頭, 大家確實有緣, 但同時亦遇上機上極具可怕的事情 ... 就是 ... 在我們的機艙裡居然有幾個由手抱至幾歲大的頑童, 三個大喊加上兩個大叫, 隨時隨地都知道他們的存在, 更利害的是他們根本不需要睡眠, 真的 Oh My God, 說到這裡, 相信大家都應知道我們的下場 ... 坐這樣十多小時的長途飛機已是一種不折不扣的苦事, 再加上他們三小兩大全天候播放的交響樂, 簡直是一種折磨 ...
終於捱過了 11 小時多的漫長機程, 十分欣賞機師的駕照技術, 更感謝他控制得相當穩定, 幸運地沒遇上太多氣流, 可以說是不幸中的大幸 ...
看見那西班牙家庭興奮地提着行李離開機場的一殺那, 感覺就像十天前我們剛到達馬德里機場的情境一樣, 似曾相識 ~ ... 當準備回家的一刻, 剛巧遇上機師及機組人員在前面經過, 真的有點衝動跟他們說聲 : 謝謝 ! 你們真的很棒 ...
~ 完 ~
沒有留言:
發佈留言